ҚАЛАЛЫҚ ҚОҒАМДЫҚ КЕҢЕСІНІҢ КЕЗЕКТІ ОТЫРЫСЫ ӨТТІ

2024 жылдың 23 мамыр күні Қызылорда қалалық Қоғамдық кеңесінің жұмыс жоспарына сәйкес кезекті отырысы өтті.

Отырысқа қалалық Қоғамдық кеңес мүшелері, қала әкімдігінің дербес бөлім басшылары, Қосшыңырау ауылдық округінің әкімі, Қызылорда қалалық төтенше жағдайлар басқармасының, облыстық Төтенше жағдайлар департаментінің Жедел құтқару жасағының басшылары, қалалық Полиция басқармасының жергілікті полиция қызметінің бастығы, ҚР Мемлекеттік қызмет істері агенттігінің Қызылорда облысы бойынша департаментінің басқарма басшысы, «Қызылорда «Автобус паркі» ЖШС-нің басшысы және бұқаралық ақпарат құралдарының өкілдері қатысты.

Қоғамдық кеңестің күн тәртібіне «Қызылорда қаласының Қосшыңырау ауылдық округі әкімінің аппараты» КММ көрсетілген мемлекеттік қызметтері туралы», «Қала аумағындағы аялдамаларды күтіп ұстау мен халыққа қызмет көрсетудің жай-күйі туралы», «Маусымдық суға шомылу кезіндегі қауіпсіздік шараларын ұйымдастыру туралы», «Шаруа немесе фермер қожалығын, ауыл шаруашылығы өндірісін жүргізу үшін уақытша өтеулі жер пайдалану (жалға алу) құқығын беру жөніндегі конкурсқа шығарылатын жер учаскелерінің тізбесін келісу туралы» мәселелер шығарылды.

Аталған мәселелер бойынша Қосшыңырау ауылдық округі әкімі С.Әбдіқадіров, қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы Д.Бақтияров, Қызылорда қалалық Төтенше жағдайлар басқармасы бастығының міндетін атқарушы Е.Райымбеков, қалалық ауыл шаруашылығы мен жер қатынастары бөлімінің сектор меңгерушісі М.Әжібеков хабарлама жасап, қоғамдық кеңес мүшелері тарапынан қойылған сауалдарға жауап берді.

Отырыс барысында, кеңес мүшелері А.Шаукенбаев мемлекеттік көрсетілетін қызметтерді сапалы және уақытылы көрсету, М.Есжанов ауылдық жерлердегі халықтың тұрмыс жағдайына қарай жер учаскесін жеке меншікке ақысын бөліп төлеу мүмкіндіктеріне басым бағыт беру, Ғ.Камалов орнатылуы былтыр жоспарланған жылы аялдамалардың салынуын жылдамдату, Ж.Садвакасова аялдамаларды орнату барысында мүгедектігі бар адамдарға арналған пандустардың талапқа сай болуы, А.Шалғынбаева автобус аялдамаларын бұзақылық ниетпен бүлдірген құқық бұзушыларға қолданылған шаралар туралы мәліметтер мен роликтерді бұқаралық ақпарат құралдары арқылы кеңінен тарату, Т.Қасымов суға шомылу маусымында қайғылы жағдайларды болдырмау үшін халыққа колжетімді, қауіпсіз коммуналдық жағажайлар ашу, А.Байдаулетов «шомылуға тыйым салынады» ескертпе тақтайшаларын орнатуды тездету, судағы қауіпсіздікті сақтау туралы бейнероликтерді, ақпараттарды қазіргі таңда халықтың көп пайдаланатын фейсбук, инстаграм әлеуметтік желілерінде кеңінен тарату бағытындағы ұсыныстарын берді.

Отырысқа қалалық Қоғамдық кеңестің төрағасы С.Дүйсенбаев төрағалық етті.

Фото

Previous Next