Қобда аудандық Қоғамдық кеңесінің кезекті отырысы

Ағымдағы жылдың 20 қыркүйегінде Қобда аудандық Қоғамдық кеңесінің кезекті отырысы өтті.
 Күн тәртібіне сәйкес бірінші тақырыпта ауданымыздағы ұялы байланыс жүйесі бойынша ауылдық округтерде атқарылған жұмыстары туралы Қобда ауданы әкімі аппаратының құжаттамалық қамтамасыз ету және мемлекеттік қызметтер көрсету мәселелерін үйлестіру бөлімінің бас маманы А. Туребаев баяндады. Кеңес мүшелерінің тарапынан сұрақтар қойылып, байланыс нашар ауылдық жерлер бойынша бірқатар ұсыныстар берілді.
 Аудандағы тұрмысы төмен отбасылар, көпбалалы аналар және әлеуметтік қорғалмаған статустағы тұлғаларға көрсетіліп жатқан қызметтер туралы есебі бойынша аудандық жұмыспен қамту және әлеуметтік бағдарламалар бөлімінің сектор меңгерушісі Д. Нұркеев толықтай баяндап берді.
 Сонымен қатар, аудан елді-мекендерінде ардагерлерге жасалған жағдайлар мен олардың белсенділігін арттыруға, өмір тәжірибесін насихаттауға бағытталған шаралар туралы тақырып та назардан тыс қалмады. «Ардагерлер ұйымы» республикалық қоғамдық бірлестігінің Қобда аудандық филиалының төрағасы Н. Кереймағанбетов атқарылған шаралар бойынша толық тоқталып өтті.
Кеңес мүшелері тарапынан бірқатар ұсыныс-пікір айтылып, хаттамаға тіркелді.

Отырыс соңында кеңес мүшелеріне аудандық Қоғамдық кеңес төрағасының міндетін атқарушы Н. Кереймағанбетов кеңес мүшелеріне «Қазақстан Азаматтық Альянсы» ЗТБ ұйымдастырған «Қоғамдық кеңестер институтын дамыту» жобасы аясында ұйымдастырылған оқыту семинарына қатысқандарын растайтын сертификаттарын табыстады.

Фото

Previous Next