Адал жастар - парасатты қоғам кепілі форумы өтті

Біріккен Ұлттар Ұйымының бастамасымен 2004 жылдан бастап 9 желтоқсанда Халықаралық сыбайлас жемқорлыққа қарсы күрес күні аталып өтеді.

Атаулы күнге орай Шерхан Мұртаза атындағы Халықаралық Тараз инновациялық институтында “Адал жастар - парасатты қоғам кепілі” тақырыбында форум ұйымдастырылды.

Форумға мемлекеттік қызметкерлер, ғалымдар, ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаменті, “ЖАҢАРУ” сыбайлас жемқорлыққа қарсы жалпыұлттық қозғалыс” РҚБ Жамбыл облысы бойынша филиалының өкілдері, қоғам белсенділері, мәслихат депутаттары, мектеп оқушылары, оқу орындарының студент жастары қатысты.

Облыс әкімінің орынбасары Серік Сәлемов еліміздің ертеңі, ұлтымыздың болашағы, мемлекетіміздің мәртебесі - бүгінгі жастарды адалдыққа, шыншылдыққа тәрбиелеу, туған жерге мейлінше қалтқысыз қызмет етуге баулу басты назарда екендігіне ерекше тоқталып, хакім Абайдың “Адал еңбекпен мал іздемек, арлы адамның ісі” деген өсиеті әр салада адалдық басты орында тұрса әділдік сөзсіз орнайтынын меңзейтінін, қоғамдағы ізгілік адалдықтан бастау алатынын, сондықтан Әділетті Қазақстанды құру үшін әрбір азамат адал азамат болуы тиістігін атап өтті.

Жастар арасында жемқорлыққа қарсы мәдениетті қалыптастыру мақсатында ұйымдастырылған форумда Департаменттің басқарма басшысы Дәурен Омаров жемқорлыққа қарсы қабылданатын шаралардың тиімділігін арттыру бағытында түрлі ақпараттық түсіндіру, азаматтардың құқықтық сауаттылығын арттыру сынды шараларды өткізу елімізде жемқорлық індетін азайтуға ықпал ететінін айта келе, алайда білім саласында ертең ел тізгінін ұстайтын жастардың бойында адалдық қасиеттері мен парасаттылық құндылықтарын дарыту табыс факторы болып табылатынына тоқталды.

Басқарма басшысы Дәурен Даниярбекұлы атап өткендей, оқу орындарымен бірлесе жастардың қатысуымен адалдық пен парасаттылық құндылықтарын күшейту мақсатында 800-ге жуық іс-шаралар өткізілген. Жамбыл өңірінде бастау алған “Парасат елшісі” республикалық байқауы аясында ел аумағында 2 ай ішінде өткізілген 100-ге жуық іс-шараларға 5000 адам қатысқан. Департаменттің “Жемқорлыққа қарсы” волонтерлік жобасы аясында белсенді жастар мен волонтерлардың қатысуымен 50-ге жуық іс-шаралар өткізіліп, 200 млн. теңге бюджет қаражаты үнемделген, 1000 тұрғынға тегін заңгерлік көмек көрсетілген.

 Мемлекет басшысы атап айтқандай, халық сыбайлас жемқорлыққа қарсы бірлескен, ымырасыз күреске мүдделі болуы тиіс, ең бастысы жұртшылық жемқорлық көріністеріне төзбей, сол бойынша хабарлап, ілкімді шаралар қабылдауы тиіс.

 Институт ректоры, белгілі ғалым, қоғам қайраткері Махметғали Сарыбеков сөзін халқымыздың “Құтты қонақ келсе, қой егіз табады” деген нақылымен бастап, оқу орнына “университет” статусы берілгенін форумға қатысушыларға қуана жеткізді.

Форум тақырыбының өзектілігіне тоқталған Махметғали Нұрғалиұлы адалдыққа байланысты қазақтың ғұлама ғалымдарының, 1916 жылы жазылған Шәкәрім Құдайбердіұлының “ Жақсы адам” мақаласында “Жақсы адам ең алдымен, адал азамат болуы керек, жақсы адам адамзатқа өзінің пайдасын келтіруі керек” деген қорытындысы, Қазақстанның халық жазушысы Шерхан Мұртаза “Адамға бала жастан ең керегі ұят деген қасиет, ол туа бітеді. Бірақ кейбіреуі өсе келе, есейе келе ұяттан жұрдай болады. Бір кем дүние…” деп баса айтуы, тарихты мысалға келтіре отырып, қазіргі мемлекеттік жастар саясатының негізгі бағыты жастардың бойында сыбайлас жемқорлыққа қарсы мәдениетті қалыптастыру, құқықтық сауаттылықты арттыру, бұл жұмыстарға кешенділік беру туралы жан-жақты баяндады.

 Осы мақсатта Агенттік пен институт арасында қол қойылған меморандум аясында бекітілген кешенді жоспарға сәйкес іс-шаралар ұйымдастырылғаны және бұл жұмыстардың жаңа форматта өткізілуінің маңыздылығын айта келе институт басшысы осы мақсатта Агенттік өткізген “Абай сөзі - әділдік темірқазығы” атты республикалық зияткерлік ойындарында оқу орнының командасы 1-ші орынға ие болғанын атап өтті.

 Сонымен қатар Агенттіктің бастамасымен жүзеге асырылған “Адалдық сағаты” жобасы аясында мемлекет және қоғам қайраткерлері Бауыржан Момышұлы, Шерхан Мұртаза туралы бейнелекциялардың мән-маңызы және осы форумда 3-ші рет өткізілетін қазақ халқының ұлы тұлғасы Тұрар Рысқұлов туралы бейнесабақтың ұлт қайраткерінің өмір сүрген тарихи заманы, оның қалдырған мұрасы, жастардың санасын өзгертуге ықпалы туралы, осындай жобалардың жастарды адалдыққа тәрбиелеудегі маңыздылығына ерекше тоқталды.

 “ЖАҢАРУ” Сыбайлас жемқорлыққа қарсы жалпыұлттық қозғалыс” РҚБ Жамбыл облысы бойынша филиалының жетекшісі Қасымхан Төлендиев қоғамның басты талабының бірі - әділдік пен заң үстемдігін құру жолында ең үлкен кедергі сыбайлас жемқорлық екендігіне, өкінішке орай Сыбайлас жемқорлыққа қарсы күресті тек уәкілетті орган “АНТИКОР”, сонымен қатар прокуратура, қаржы мониторингі, экономикалық қылмыспен күрес департаменті, ҰҚК, ІІМ өз құзыреттері шегінде жүргізетініне тоқтала келе, ал басқа мемлекеттік органдардың жемқорлыққа қарсы әрекеті байқалмайтынын айтты.

 Қазақстандықтардың жалпыұлттық күресте айтарлықтай белсенділік таныта алмай отырғаны, ақшалай сыйлық берілуіне қарамастан жемқорлық туралы хабарлауға көбісі құлықсыз екендігін баса айтқан Қасымхан Естемесұлы осы мақсатта республикалық қоғамдық бірлестік төрағасы және облыс әкімі сыбайлас жемқорлыққа қарсы күрес жөніндегі меморандумға қол қойғаны, “ЖАҢАРУ-дың” облыстық филиалы облыс әкімдігімен, облыс бойынша сыбайлас жемқорлыққа қарсы қызметімен, мемлекеттік қызмет істері департаментімен, облыстық қоғамдық кеңеспен, ардагерлер кеңесімен, кәсіпкерлер палатасымен,

“АМАНАТ” партиясымен, ауыл шаруашылығы басқармасымен, облыстық ТВ-мен ынтымақтастық орнатылып, оқу орындарының жастары арасында атқарылған ауқымды іс-шаралар, жаңа жобалар туралы толық баяндады.

 Форумда ұлтымыздың ұлы перзенті Тұрар Рысқұлов туралы бейнелекция, жастардың қатысуымен сыбайлас жемқорлық туралы композициялық қойылымдар көрсетілді.

 Форум соңында қоғамда сыбайлас жемқорлыққа қарсы мәдениетті қалыптастыру жұмысына атсалысқан бірқатар азаматтар “ЖАҢАРУ” Сыбайлас жемқорлыққа қарсы жалпыұлттық қозғалыс” РҚБ Төрағасы М. Семғалиевтің Алғыс хатымен марапатталды.

Фото

Previous Next