Студенттер мәселесі – қоғамдық кеңес назарында

Қай кезде де жастардың алдын тосып тұратын жаңа мүмкіндіктер де, салын суға кетіретін қиындықтар да қатар жүретіні ақиқат. Бір студент оқуының ақысын төлей алмай қиналса, тағы бір жас жұмысқа тұра алмай қамығып күн кешеді. Енді бірі заңнан әділдік іздесе, бір өреннің кәсіп бастауына әкімшілік, заңдық кедергілер мұрша бермеуі мүмкін. Мұндайда олардың өздері немесе ата-анасы жергілікті жердегі қол ұшын береді-ау деген ұйымдар мен мемлекеттік мекемелерді жағалайды.

Жамбыл ауданы, Гродеково ауылының тұрғыны Қалымкүл Жасыбекқызы (аты-жөні өгертілді) редакциямызға хабарласып, қызының тегін білім алуына көмектескен облыстық қоғамдық кеңес мүшелеріне алғыс білдіргісі келетінін жеткізді.

– Мүгедектігі бар ата-ана ретінде мәселеміздің шешілгеніне аса қатты қуаныштымын. Қызым М.Х.Дулати атындағы Тараз университетінде білім алып жүр. Оның оқу ақысын төлеуден қиналып, жеңілдік сұрап бармаған жерім, баспаған тауым қалмады. Бар үмітімді желеу етіп, облыстық қоғамдық кеңес төрағасы Марат Әбдірайымовтың атына қызымның оқу ақысын 50 пайызға дейін төмендетуді сұрап хат жаздым. Өзіне кіріп, жағдайымды түсіндірдім. Тиісті комиссияға қажетті құжаттарды, оның ішінде менің де, әкесінің де мүгедек екені туралы анықтама мен жалдамалы үйде тұратынымыз туралы дәлелді құжаттарды ұсындым. Нәтижесінде қобалжыған жүрегім тыныш тапты. Сондықтан қоғамдық кеңес мүшелеріне айтар алғысым шексіз, – деді тұрғын.

Мемлекет тарапынан білім алуға, жұмысқа орналасуға, кәсіп бастауға, спортпен, түрлі шығармашылықпен айналысуға барлық жағдай жасалып-ақ жатыр. Дегенмен жастардың күнделікті тіршілігінде осы секілді шешімін таппай жатқан түйткілдер ескерусіз қалмағаны бізді де қуантты. Осы орайда облыстық қоғамдық кеңес төрағасы Марат Жаңабекұлына хабарласып, мән-жайға жете қаныққан едік.

 – Алғыс бізге емес, аталған университеттің ректоры Мұхтар Байжұмановқа айтылуы керек. Өйткені бұл жерде әлеуметтік жағынан осал топқа жататын отбасының мәселесін осы оқу орны шешіп тұр. Негізінде Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында әлеуметтік тұрғыдан осал азаматтарға қолдау көрсету өте маңызды міндет екенін, мемлекет әлеуметтік шығыстарды біртіндеп ұлғайту арқылы бюджеттің жартысынан көбін әлеуметтік салаға жұмсайтынын атап көрсетті. «Қоғамдық кеңес туралы» Заңның 5-бабына сәйкес қоғамдық кеңес жеке және заңды тұлғалардың қоғамдық маңызы бар мәселелер бойынша жолданымдарын қарайды. Облыстық қоғамдық кеңес аталған заң аясында 2024 жылы жеке және заңды тұлғалардан түскен 7 жолданымды қарап, тиісті жұмыстар жүргізді. Осындай жолданымдардың бірі – Гродеково ауылдық округінің тұрғыны, II-топтағы мүгедектігі бар ананың М.Х.Дулати атындағы Тараз университетінде ақылы негізде үздік оқитын студент қызының оқу ақысын төлеу бойынша жеңілдіктер беруге көмек көрсетуді сұраған өтініші еді. Бұл жұмысты жүргізуімізге әлеуметтік осал топтарға жататын, үздік оқитын жастарға қолдау көрсету мәселесі себеп болды. Негізінде облыстық қоғамдық кеңестің білім, денсаулық сақтау, спорт, мәдениет, әлеуметтік мәселелер жөніндегі комиссиясының мүшелері, Ұлттық құрылтай мүшесі Әйгерім Дәулетбаева мен облыстық ата-аналар кеңесінің төрағасы Ринат Нұрақбаевқа қыркүйек айында бұл туралы тапсырма берілген болатын. Өз кезегінде біз қоғамдық кеңес атынан аталған ата-ананың арызы бойынша университет ректоры М.Байжұмановқа қатынас хат жолдасақ, ректорда қоғамдық кеңес мүшелерін қабылдау және басқа да іс бойынша өз ілтипатын танытты. Университеттің 2024 жылғы 4 қазандағы «2023-2024 оқу жылының қорытындысы бойынша босаған вакантты орындарға ақылы негізде оқитын білім алушыларды мемлекеттік білім беру грантына ауыстыру туралы» бұйрығына сәйкес қоғамдық кеңеске өтінішпен қайырылған ата ананың қызы грант иегері атанғаны туралы бұйрықтың көшірмесі қоғамдық кеңеске жолданған болатын. Қазіргі уақытта ол қыз грантқа ауыстырылып, тегін білім алып жүр, – деді Марат Әбдірайымов.

Осы тұста ең негізгі айта кетер жайт, бір адамның мәселесін көтеру арқылы ондағы осы санатқа жататын, яғни ата-анасының мүгедектігі бар немесе үлгерімі жақсы жастарға жеңілдік беру мүмкіндігінің жасалуы. Нақты айтар болсақ, университеттің 2021 жылы қабылдаған ережесінде ақылы негізде оқитын студенттерге жеңілдіктер беру қарастырылмаған екен. Қоғамдық кеңестің хатынан кейін осы сұрақты шешу үшін ақылы негізде оқитын студенттерге 30 пайыз жеңілдік беру туралы университет ішкі ережелеріне өзгеріс енгізуді қолға алған көрінеді.

– Директорлар кеңесімен бекітілген аталған университеттің білім беру бағдарламалары бойынша оқу ақысын төлеуге қатысты жеңілдіктер беру туралы ережесінде ата-анасының мүгедектігі бар отбасылардан шыққан студенттерге жеңілдік беру қарастырылмаған екен. Университет ректоры Мұхтар Қазбекұлы қоғамдық кеңес мүшелерінің әлеуметтік қолдауға мұқтаж жастарды қолдау туралы сұрағының маңызды екендігін және жаңа 2024-2025 оқу жылында ережеге өзгертулер мен толықтырулар енгізу үшін ата-анасының мүгедектігі бар отбасылардан шыққан студенттерге оқудың барлық кезеңіне 30 пайыз жеңілдік беру туралы директорлар кеңесіне құжат бекітуге ұсынылатынын жеткізді. Жастар – мемлекет болашағы, қоғамның қозғаушы күші. Елімізге белсенді, білімді, көзі ашық, көкірегі ояу жастар керек. Тәуелсіздігімізді нығайтып, елімізді дамыту – қазіргі жастардың басты міндеті. Қазақстанның болашағы жастар еншісінде екенін ескерсек, олардың сапалы білім алып, тәрбиелі, парасатты азамат болып қалыптасуына қоғамның да тигізер ықпалы зор екені анық. Қоғамдық кеңесте қарастырылған мәселелердің бірін шешу арқылы жалпы қоғамдағы өзекті тақырыптың бірі – әлеуметтік көмекке мұқтаж отбасыларға нақты қолдау көрсетіп, жастардың тиянақты білім алуына жағдай жасау азаматтық. Осыны мақсат еткен парасатты азамат, белгілі ғалым Мұхтар Байжұманов басқаратын өңіріміздегі іргелі білім ордасы М.Х.Дулати атындағы Тараз университетінің ұжымына айтар алғысымыз шексіз, – деді М.Әбдірайымов.

Облыстық қоғамдық кеңеске 23 қазанда жолданған хатта университет тарапынан аталған мәселе бойынша директорлар кеңесінің қабылдаған шешіміне қарай тиісті жұмыстар жүргізілетіні туралы ресми хат жіберілген екен. Алдағы уақытта бұл мәселе оң шешімін табады деген үміттеміз.

Жалпы ақылы негізде білім алатын студенттерге, оның ішінде әлеуметтік жағынан осал топқа жататын отбасылардан шыққандарға қолайлы жағдай жасалып, алаңсыз білім алуына мүмкіндік берілсе, бұл расында да қоғамның ілгерілеуіне негіз болмақ.

Нұрым СЫРҒАБАЕВ

Фото

Previous Next