ҚОҒАМДЫҚ КЕҢЕС: ҚОҒАМДА ЗАҢ МЕН ТӘРТІП ҮСТЕМДІК ҚҰРУЫ ТИІС

 “Қоғамдық кеңестер туралы” ҚР Заңына сәйкес Жамбыл облыстық Қоғамдық кеңесінің отырысында жергілікті деңгейде заңдылықты қамтамасыз ету және адам мен азаматтың құқықтарын және бостандықтарын сақтау мәселелері бойынша Жамбыл облыстық Полиция департаментінің ақпараты тыңдалды. 

Полиция департаментінің бастығы Бақытжан Малыбаев ағымдағы жылдың 11 айында барлық санаттар бойынша қылмыстарды тіркеу төмендегені, 2023 жылмен салыстырғанда қылмыстарды ашу 
жақсарғанына тоқталып, бұзақылық, денсаулыққа ауыр зиян келтіру, кісі өлтіру, 
бөтеннің мүлкін ұрлау, мал ұрлығы, алаяқтық қылмыстарын ашу көрсеткіштері едәуір көтерілгенін атап өтті. 

Департамент бастығы Бақытжан Әсембекұлы интернет-алаяқтық жасаумен былтыр 168 адам ұсталса, ал биыл бұл қылмысты 197 азамат жасағаны, оның ішінде 56 кәсіби интернет-алаяқтардың ұсталғанын және олардан зардап шеккен адамдарға 550 млн. 837 мың теңге материалдық залал келтірілгені, оның 78 млн. 871 мың теңгесі өтелгені туралы ақпарат берді. 

Сонымен қатар есірткі қылмысына қарсы іс-қимыл желісі бойынша 457 есірткі құқық бұзушылықтары анықталғаны, қабылданған шаралар нәтижесінде заңсыз айналымнан 6 тонна 643 кг 380 гр түрлі есірткі заттары тәркіленгені, бұл өткен жылмен салыстырғанда 1 тоннаға көп екендігі, синтетикалық есірткі сақтаудың ықтимал орындары, граффити жазбалар туралы облыс тұрғындарынан хабарламалар жинайтын “NarcoShekteuTaraz” телеграмм-ботына 2 мың 47 өтініш келіп түскені туралы айтылды. 

Департамент басшысы баяндап өткендей, жол қауіпсіздігі саласы бойынша облыс жолдарында ағымдағы жылдың 11 айында жол-көлік оқиғаларының саны 1054-тен 1742-ге дейін, яғни 65,3%-ға артып, қаза тапқандар 26,8%-ға өскен, ал зардап шеккендер 68,2%-ға ұлғайған. 

745 жүргізуші мас күйінде ұсталса, жылдамдық режимін бұзуға қатысты 470 мыңнан астам құқық бұзушылық анықталған. Арнайы айыппұл тұрағына 3 мың 673 автокөлік қойылған, бұл өткен жылмен салыстырғанда 19,8%-ға артқан.

Кеңес мүшелері Б. Құлекеев, Қ.Шотбақов, Р. Рахманбердиев, Ә.Даулетбаева, Ә.Зәуірбеков тарапынан құқық қорғау органдарының қызметіне қатысты бірқатар сұрақтар қойылып, ұсыныстар берілді. 

Қоғамдық кеңестің төрағасы Марат Абдраимов Жуалы аудандық Қоғамдық кеңесінің аудандық полиция бөлімінің жұмысына жүргізген қоғамдық мониторинг қорытындысын Полиция департаментінің бастығы Бақытжан Малыбаевқа тапсырды. 

Мемлекет басшысы Қасым-Жомарт Тоқаев “Әділетті Қазақстан: заң мен тәртіп, экономикалық өсім, қоғамдық оптимизм” атты халыққа Жолдауында атап көрсеткендей, “Біздің қоғамымызда заң мен тәртіп үстем құруға тиіс. Бұл - бүкіл қоғамның және әр азаматтың қауіпсіздігін қамтамасыз етуге қатысты ең басты талап. Біз сонда ғана Әділетті, Таза және Қауіпсіз Қазақстанды құра аламыз”.

Фото

Previous Next