Қазкеңес жаңалықтары

Халықты МӘМС-ға тарту туралы

Бәкір Демеуовтың төрағашылығымен өткен облыстық қоғамдық кеңестің отырысында халықты міндетті әлеуметтік медициналық сақтандыру жүйесіне тарту бойынша ведомствоаралық жұмыс қаралды. Отырыс жұмысына Павлодар облыстық мәслихатының төрағасы И. Теренченко қатысты. Облыс денсаулық сақтау басқармасы басшысының орынбасары А. Мұхамбетов халықпен және медицина қызметкерлерімен жүргізіліп жатқан жұмыстар және 2025 жылға қойылған міндеттер туралы хабарлады. Облыстың жұмыспен қамтуды үйлестіру және әлеуметтік бағдарламалар басқармасының басшысы А. Дисюпова Отбасының цифрлық картасына сәйкес Д және Е санатындағы адамдарды өзектендіру бойынша жұмыстар жүргізіліп жатқанын баяндады. Қоғамдық кеңес мүшелерінің сұрақтарына Павлодар облысы бойынша Мемлекеттік кірістер департаментінің басшысы Е. Тоқтарханов, Полиция департаменті бастығының орынбасары С. Жампейісов, әлеуметтік медициналық сақтандыру қорының халықты ақпараттандыру және өтініштерді қарау бөлімінің басшысы Э. Темірғалиева, Екібастұз қаласы, Ертіс және Шарбақты аудандары әкімдерінің орынбасарлары жауап берді. Мәселені талқылауға қоғамдық кеңестің мүшелері Б. Бексейітова, Е. Жанғазы, А. Қозбаева, Ш. Кусегенов, А. Оспанова, М. Стрелковская және басқалар белсенді қатысты. Өткізілген отырыстың қорытындысы бойынша жауапты мемлекеттік органдарға және қалалар мен аудандардың әкімдіктеріне ұсынымдар берілді. Әрбір сақтандырылмаған азаматты дербес есепке алу, шаруа қожалықтарының басшыларымен маусымдық жұмыстарда жүрген азаматтарды медициналық сақтандыру бойынша есепке қою және төлеу бойынша жұмыс жүргізу қажет. Әлеуметтік медициналық сақтандыру қорлары өзінің ашықтығын, азаматтар үшін медициналық қызметтер алу тәртібі туралы ақпараттың қолжетімділігін арттыруға бағытталған жұмысты жүргізсін. Ағымдағы жылдың 1 шілдесіне дейін әрбір қала/ аудан бойынша сақтандырылмаған азаматтар санын 15%-ға азайту, Бірінші жартыжылдық қорытындылары бойынша жүргізілген жұмыстың нәтижелерін облыстық қоғамдық кеңестің білім беру, денсаулық сақтау, мәдениет және әлеуметтік қорғау мәселелері жөніндегі комиссиясының отырысында қарау ұсынылды.

Фото