Қазкеңес жаңалықтары
KazKENES жаңалықтарыТҮРКІСТАН ОБЛЫСЫ ТӨЛЕБИ АУДАНДЫҚ ҚОҒАМДЫҚ КЕҢЕСІНІҢ АУДАН ТҰРҒЫНДАРЫНА ҮНДЕУІ.
Төлеби аудандық Қоғамдық кеңес мүшелерінің Ленгір қаласы мен барлық ауылдық округ тұрғындарына, мекемелер мен ұйымдар, жеке құрылымдар басшыларына, еңбек ардагерлері мен зиялы қауым өкілдеріне, аудандық мәслихат депутаттарына, ұлттық этно-мәдени орталықтарына, ардагерлер кеңесі мен ауыл билеріне, жалынды жастарымызға, жалпы барша аудан халқына
ҮНДЕУІ
Құрметті Төлебиліктер!
Ақ қарлы қыстың көрпесі сөгіліп, жерге де, елге де жылы шуағын сыйлаған көктем келіп жетті. Бірер күнде табиғат анамыз қайта оянып, бар ағаштар бүршік атып, төңірек түрлене түседі. Ата-бабаларымыз «Көктемнің бір күні – жылға азық», «Бір тал кессең, он тал ек»-деп ұрпақтарына үлкен өсиет қалдырып кеткен. Осы аталы сөздің үдесінен шығып, көктемнің әрбір күнін ұтымды пайдаланған жөн.
Ауданымыздағы әрбір мемлекеттік қызметкер, аудандық мәслихат депуттатары, құқық қорғау орган қызметкерлері, ардагерлер, ауыл билері, білім беру мекемелері мен медицина саласы қызметкерлері аудан аумағындағы барлық елді мекендерді көркейтуге, көгалдандыруға жұмыла кірісуге, қолына күрек ұстай алатын жас баладан еңкейген қартқа дейін бір кісідей үлес қосуға шақырамыз. Егер баршамыз бес саусақтай бірігіп, алақандай жұмылып, ынтымақ пен бірліктің нағыз үлгісін танытқанда ғана киелі туған жерімізді жасыл желекке бөлей аламыз. Жыл сайын көктем мен күз айларында көптеген көшеттер сатып алынып, көшелер мен жол бойларына отырғызылады. Егер сол көшеттердің ғұмыры жаз айларына да жетпей қурап қалмағанда, бүгіндері біздің ауданымыздағы елді мекендердің бәрі жайқалған жасыл орманға оранып тұрған болар еді.
Қадірлі қала және ауыл тұрғындары! Биылғы жылы елімізде Ұлы Жеңістің 80 жылдығы кеңінен аталып өтілмек. Бұл атаулы күн Қазақстан халқы үшін ерекше маңызға ие. Осыған орай, еліміздің барлық өңірлерінде бірқатар маңызды іс-шаралар ұйымдастырылуда. Мемлекет басшысы Ұлы Жеңіс күнін кең көлемде дәріптеу және батырлардың өшпес ерлігін жадымызда жаңғырту қажеттігін де атап өткен болатын.
Ең бастысы, Ұлы Отан соғысына қатысқан ардагерлерімізге құрмет көрсету – бұл баршамыздың парызымыз. Әр ауылдарда Ұлы Отан соғысына қатысқан ардагерлерімізге арналған ескерткіштер бар, бірақ кейбірі көңіл құлазытатындай жағдайда, Өздеріңіз куәсіздер. Ескерткіштердің көпшілігі мектептердің аумағында, кейбіреулері мәдениет үйлері ауласында орналасқан. Сонымен қатар, соғыс ардагерлерінің атына берілген көшелер де бар, осы көшелерге де көңіл бөліп, тазалығын, абаттандырылуын қолға алуымыз керек. Алдағы уақытта аудан басшылығынан қолдау болып жатса, Ұлы Отан соғысы ардагерлеріне арналған заманауи үлгідегі аллеялар мен скверлер салынса деген ұсынысымыз бар. Солай болған жағдайда қаламыз бен ауылдарымыз бұрынғыдан да көріктене түсетіні сөзсіз. Ал, жағдайы төмен, сын көтермейтін ескерткіштерді бүгінгі күннен бастап ағымдағы жөндеуден өткізіп, қалпына келтіруге баршамыз бей-жай қарамай, бір кісідей жұмыла іске кірісіп, ынтымақ пен бірліктің нағыз үлгісін көрсетуіміз керек.
Құрметті жерлестер!
Біз, Төлеби аудандық Қоғамдық кеңес мүшелері барлық Төлебилік жерлестерімізге үндеу тастай отырып, жергілікті мекемелер мен ұжымдарға, әр отбасыға көшелер мен өз аулаларына алуан түрлі ағаш көшеттері мен гүлдер отырғызып, оларды көздің қарашығындай қорғап, баптап, аулаларымызды таза ұстап, киелі жеріміздің нағыз иесі болып, көркейте түсуге үлестеріңізді қосуға шақырамыз. Осылайша бір-бірімізге үлгі өнеге көрсетейік. Бұл біздің қолымыздан келетін, ынтымағымыз бен бірлігімізді паш ететін іс.
Елге мұра, ұрпаққа ұран болған Ұлы Жеңісті ұлықтау, қан майданда оқ пен оттың арасында өмірлерін қиған жанкешті еңбектерімен жеңіске үлестерін қосқан ардагерлеріміздің есімдерін құрметтеу, даңқты жолдарын үлгі-өнеге тұту бүгінгі ұрпақтар еншісінде.
Үндеу, Төлеби аудандық Қоғамдық кеңес мүшелерінің 2025 жылғы 28 ақпандағы жалпы жиналысында бірауыздан қабылданды,
Төлеби аудандық Қоғамдық кеңесі
Фото
