Комиссия отырысында қаланың проблемалық объектілері мен жер қатынастары, көлік салаларындағы сыбайлас жемқорлық тәуекелдері талқыланды

«Заң мен тәртіп» қағидаты аясында жер қатынастары және көлік салаларындағы сыбайлас жемқорлық тәуекелдеріне сыртқы талдау нәтижелері Қоғамдық кеңес жанындағы Сыбайлас жемқорлыққа қарсы іс-қимыл жұмыстарын бақылау, заңдылық, құқық тәртібі және жергілікті өзін-өзі басқару жөніндегі тұрақты комиссияның көшпелі отырысында қаралды.

Отырысқа Қоғамдық кеңес мүшелері, қалалық Сыбайлас жемқорлыққа қарсы қызмет, сондай-ақ жер қатынастары, энергетика және көлік басқармаларының өкілдері қатысты.

Іс-шарада аталған салаларды талдау барысында Департаментпен енгізілген ұсынымдардың орындалуына басты назар аударылды.

Жер қатынастары және қала құрылысы саласында әкімдік тарапынан мемлекет мұқтажы үшін мәжбүрлеп алып қою туралы шешім қабылдаған жер учаскелерінің иелеріне SMS хабарламаларды енгізу маңызды қадам болды. Хабарламалар 1414 Бірыңғай байланыс орталығы арқылы жіберіледі және бұл азаматтарды хабардар ету процесін едәуір жеңілдетеді.

Көлік саласында «Мемлекеттік сатып алу туралы» заң жобалық-сметалық құжаттамаға өзгертулер енгізілген кезде келісім-шарт сомасын ұлғайтуға мүмкіндік береді, бірақ мердігерлер мұны мерзімін кешіктіру және бағаны көтеру үшін пайдаланады. Антикор ұсынымымен бюджеттік объектілерге тапсырыс берушінің есебінен жобалық-сметалық құжаттарға түзетулер енгізу және олардың мемлекеттік сараптамадан өтуін бақылау үшін Жолаушылар көлігі басқармасында арнайы маман бекітілді.

Сонымен қатар, жиында құрылыс мерзімі ұзаққа созылған және сыбайлас жемқорлық тәуекелдер картасына енгізілген үш нысан бойынша қалалық энергетика және инфрақұрылымды дамыту басқармасы басшысының орынбасарының есебі тыңдалды.

Фото

Previous Next