АУЫЛШАРУАШЫЛЫҒЫ САЛАСЫНА МОНИТОРИНГ ЖҮРГІЗІЛУДЕ

Қазақстан егіс алқабы және жайылымдық жер көлемі жағынан әлемде 6-шы орынды алады және бидай экспорттайтын 10 ірі мемлекеттің қатарына кіреді.

 Мемлекет басшысы Қасым-Жомарт Тоқаев ауыл шаруашылығы еңбеккерлерінің бірінші форумында атап өткендей, түрлі қиындыққа қарамастан 2024 жылы қамбамыз астыққа толып, күзгі жиын-терінде 26,7 миллион тонна дақыл жиналды. Бұл - соңғы 10 жылдағы рекордтық көрсеткіш.

Форумда ауыл шаруашылығының дамуына серпін беру негізгі мақсат ретінде белгіленіп, агроөнеркәсіп кешенін қаржыландыруды жүйелі түрде жүргізу, саланы индустрияландыруды белсенді түрде жалғастыру, озық технологияларды енгізу, ауыл шаруашылығы техникасының қолжетімділігін арттыру мәселелері талқыланған болатын.

 Жамбыл облыстық Қоғамдық кеңесінің жұмыс жоспарына сәйкес кеңестің ауыл шаруашылығы, жер қатынастары және табиғи ресурстар жөніндегі комиссиясының мониторингтік тобы а.ж. сәуір айынан бастап облыс әкімдігінің ауыл шаруашылығы басқармасы, аудан әкімдігінің ауыл шаруашылығы бөлімдерінің мемлекеттік көрсетілетін қызметтері, мемлекеттік бағдарламаларды, стратегиялық жоспарларды іске асыруы барысында ұйымдастырылатын жұмыстарына қоғамдық мониторинг жүргізуде.

Комиссия төрағасы Амангелді Карентаевтың жетекшілігімен мониторингтік топ мүшелері Есембек Ошақбаев, Аманжол Аманбаев, Нұржан Артаев а.ж. 15-16 сәуір күндері Т.Рысқұлов, Меркі, Шу, Қордай аудандары әкімдіктерінің ауыл шаруашылығы бөлімдерінің жұмыстарын зерделеді.

Топ мүшелері аудан әкімдерінің орынбасарлары, ауыл шаруашылығы, жер қатынастары бөлімдері, салық басқармасы басшыларының қатысуымен бірқатар шаруа қожалықтарының жұмысымен танысып, ауылдық округтер тұрғындарымен кездесті.

Ауыл тұрғындары Н.Жанадилова, А. Досмұхамбет, Е.Юнусов, Т.Кемелбеков ауыл шаруашылығын дамыту мақсатында қаржыландыру жүйесіне қатысты сұрақтар қойып, пікірлерін айтты.

Мониторингтік топ мүшелері кездесу барысында Президент атап көрсеткендей, ауыл шаруашылығы бәсекеге қабілетті озық сала болуы керектігін, агроөнеркәсіп кешені экономикадағы басты қозғаушы күштің біріне айналуы тиістігін, бизнес те, мемлекет те осыған мүдделі екендігін, бұл ең алдымен, азық-түлік қауіпсіздігін қамтамасыз етуде маңызды екендігін және ауыл тұрғындарының тұрмысы да осы салаға тікелей байланысты екендігіне тоқталып, мемлекеттік органдар қызметінің тиімділігін, ашықтығын арттыруға бағытталған ұсыныстар берілетіндігін жеткізді.

Фото

Previous Next