Қазкеңес жаңалықтары

Алматы облысының Қарасай аудандық қоғамдық кеңесінің мүшелері 21 маусым күні Қаскелең қаласының аумағында стихиялық қоқыс үйінділеріне арнайы экологиялық мониторинг ұйымдастырды.

Қазақстан Республикасы Мәдениет және ақпарат министрлігінің бастамасымен, «Таза Қазақстан» жалпыұлттық акциясы аясында елімізде «Қоғамдық эко-бақылау» республикалық акциясы өз жұмысын бастады. Аталмыш шара 5 маусым - Дүниежүзілік қоршаған ортаны қорғау күні мен Экологтар күніне орайластырылған. Акция 5 маусым мен 5 шілде аралығын қамтиды.
​Экологиялық мәдениетті арттыру мен қоршаған ортаны қорғауға қоғам назарын аударуды мақсат тұтқан акция үш кезеңнен тұратын онкүндікке бөлінген.
Атап айтқанда:
1)​5–15 маусым аралығында туристік және тарихи-мәдени объектілерге мониторинг жүргізу;
2)​16–25 маусымда – абаттандыру, стихиялық қоқыс тастайтын орындар, жасыл желектерді күтіп-баптау мәселелерін бақылау;
3)​26 маусым – 5 шілде аралығында – жер қойнауын пайдалану саласына мониторинг жүргізу жоспарланған.
Аталған іс-шара аясында Алматы облысының Қарасай аудандық қоғамдық кеңесінің мүшелері 21 маусым күні Қаскелең қаласының аумағында стихиялық қоқыс үйінділеріне арнайы экологиялық мониторинг ұйымдастырды.
​Мониторинг жұмыстарына қоғамдық кеңестің аграрлық сала, жер қатынастары, ветеринария, сәулет және құрылыс, тұрғын үймен қамтамасыз ету, тұрғын үй-коммуналдық шаруашылығын, су және жылу жүйелерін жаңғырту мәселелері, табиғатты пайдалану және экология мәселелері бойынша комиссиясының төрағасы Сүнбеков Бекжан Батырбекұлы жетекшілік етті. Комиссия құрамында қоғамдық кеңес мүшелері: Жылқыбаев Сағындық Жұмабайбайұлы, Уразалиев Тұрғанбек Өміртайұлы және Қалдыбеков Әбіш Мамедәліұлы қатысты.
Тексеру барысында Қаскелең қаласының тазалық жағдайы зерделенді. Өкінішке орай, қоқыс үйінділері өте көп. Әкімдік тарапынан қоқыс жинау жұмыстары үнемі қатаң бақылауда, бірақ қала тұрғындарының арасында жүргізілетін түсіндіру жұмыстарының нәтижесі көрінбейтіні өкінішті-ақ! Мониторинг қорытындысы бойынша ұсыныстар дайындалып, тиісті мекемелерге жолданатын болады.

Фото