СЕНІМГЕ ИЕ КЕҢЕС: ЖАҢА ҚҰРАМНЫҢ АЛҒАШҚЫ ҚАДАМДАРЫ

Жарқайың ауданының Қоғамдық кеңесі – мемлекеттік органдар мен халық арасындағы өзара іс-қимылдың маңызды буыны болып табылады. Бұл орган азаматтардың жергілікті саясатты қалыптастыру мен іске асыруға қатысуын қамтамасыз етеді. Кеңестің қызметі ашықтықты арттыруға, қоғамдық пікірді ескеруге және қоғамдық бақылауды жүзеге асыруға бағытталған.

Қазақстан Республикасының қолданыстағы заңнамасына сәйкес, ағымдағы жылдың басында 2025–2027 жылдарға арналған Жарқайың ауданының Қоғамдық кеңесін қалыптастыруға конкурс өтті. Кеңес құрамына 11 адам кірді: 1 мемлекеттік орган өкілі және 10 – азаматтық қоғам өкілдері. Кеңес төрағасы болып Д.А. Шәкиров сайланды.

Жаңартылған құрамға түрлі салалардың өкілдері енді: депутаттар, жастар, «Аманат» партиясы, этномәдени бірлестік, бюджеттік ұйымдар, зейнеткерлер, бизнес құрылымдар, ауданның Құрметті азаматтары, БАҚ өкілдері. Барлық кеңес мүшелері – тәжірибесі мен білімі бар, ауданның игілігі үшін еңбек етуге ниетті белсенді азаматтар.

Кеңес 2025 жылға арналған Жұмыс жоспарын және Қоғамдық кеңестің қызметін реттейтін «Жарқайың ауданының Қоғамдық кеңесі туралы» Ережені бекітті.

Кеңестің жұмысы ашықтық және жариялылық қағидаттарына негізделеді. Барлық іс-шаралар кең ауқымды жұртшылықтың, мемлекеттік органдар мен БАҚ өкілдерінің қатысуымен өтеді.

Қоғамдық кеңестің негізгі жұмыс нысаны – отырыстар. Алты ай ішінде 5 отырыс өткізіліп, азаматтардың құқықтары мен бостандықтарын қорғауға қатысты және қоғамдық маңызы бар 11 мәселе қаралды. Атап айтқанда:

• Қыс мезгілінде аудан бойынша жолдарды (тротуарларды) күтіп-ұстау және қар шығару жұмыстары туралы;
• Интернет алаяқтықтың алдын алу және жолын кесу шаралары туралы;
• 2024 жылға арналған аудандық, Державинск қаласының, ауылдық округтер мен елді мекендердің бюджетінің орындалуы туралы;
• Мал шаруашылығын дамыту мәселелері және оларды шешу жолдары туралы;
• Аудандағы конфессияаралық және этносаралық келісімді нығайту жұмыстары туралы.
• Әрбір мәселе талқыланғаннан кейін кеңес мүшелері тиісті ұсыныстар әзірлеп, оларды мемлекеттік мекеме басшыларына жолдайды.

Осы кезеңде кеңес 12 нормативтік-құқықтық акт жобасын қарады, олардың ішінде:

• Жарқайың аудандық мәслихатының 2023 жылғы 22 желтоқсандағы № 8С-19/3 «Жарқайың ауданында әлеуметтік көмек көрсету қағидаларын, оның мөлшерін айқындау және мұқтаж азаматтардың жекелеген санаттарының тізбесін бекіту туралы» шешіміне өзгерістер енгізу туралы;
• Жарқайың ауданы әкімдігінің 2017 жылғы 24 сәуірдегі № А-4/206 «Аудандық коммуналдық мүлікті иеліктен шығару түрлерін айқындау критерийлері туралы» қаулысының күшін жою туралы;
• «2025–2029 жылдарға арналған жайылымдарды басқару және оларды пайдалану жөніндегі жоспарды бекіту туралы»;
• Жарқайың аудандық мәслихатының 2024 жылғы 23 желтоқсандағы № 8С-42/2 «2025–2027 жылдарға арналған Жарқайың ауданының, Державинск қаласының, ауылдық округтер мен елді мекендердің бюджеттері туралы» шешіміне өзгерістер енгізу туралы.

Кеңес мүшелері азаматтардың құқықтары мен мүдделерін қорғау, қоғамдық ұйымдармен өзара іс-қимыл орнату және қоғамдық бақылау жүргізу бойынша белсенді жұмыс атқаруда.

Қоғамдық кеңестің жұмыс тобы ақпан айында Г.В. Смагулованың төрағалығымен қала әкімдігі, ТКШ, Коммунсервис, учаскелік инспектор және БАҚ өкілдерімен бірлесіп, қысқы уақытта жолдар мен тротуарларды тазалау жұмыстарын бақылау мақсатында қалаға шығып, мониторинг жүргізді.

Тексеру барысында Вокзал, «Элита» дүкені мен Орталық дәріхана маңында жиналған қар үйінділері анықталды. Объектілердің иелеріне абаттандыру ережесіне сәйкес іргелес аумақты дербес тазалау қажеттігін еске салу ұсынылды. Мира мен Московская көшелерінің қиылысында жолды кеңейтіп, жол жиегін қардан тазалау ұсынылды. Мира мен Захаров көшелеріндегі тротуарлар қармен жабылған. Сонымен қатар ПМК кентіндегі, аудандық аурухана маңындағы жолдар тазартылған.

Кеңес мүшелері қар тазалау сапасын бақылауды күшейту, тұрғындардың өтініштеріне жедел әрекет ету және кәсіпкерлер мен халық арасында түсіндіру жұмыстарын жандандыру қажеттігін атап өтті. Қыс мезгілінде қалалық аумақтарды күтіп-ұстау мәселесі тұрақты бақылауда болды.

Маусым айында кеңес төрағасы Д.А. Шәкиров бастаған жұмыс тобы құрамында Г.Ж. Егізбаев пен Т.К. Сайфуллина Жарқайың ауданының және Гастелло ауылындағы «Орталықтандырылған кітапхана жүйесі» КММ-сіне барып, көрсетілетін қызметтердің сапасымен танысты.

Қоғамдық кеңес мүшелері мекемелердің жұмысымен, келушілерге жасалған жағдайлармен, жобалармен және даму жоспарларымен танысты. Директор Ж. Сейітбек экскурсия өткізіп, жұмыс тәжірибесімен және болашақ бастамалармен бөлісті.

Бірқатар ескертулер тіркелді: ғимаратқа кіру кезінде қиындықтар және мүмкіндігі шектеулі адамдар үшін визуалды навигацияның жеткіліксіздігі байқалды. Ғимараттың қасбетін жөндеу және екінші қабаттағы еден жабындысын жаңарту әлі аяқталған жоқ.

Жалпы, аудандық кітапхана жүйесі тұрақты және тиімді жұмыс істейді: кітап қоры үнемі жаңартылып отырады, мекеме тек оқу залы емес, сонымен қатар қарым-қатынас, ағарту және даму үшін ашық кеңістікке айналды. Жұмыс әлеуметтік желілерде белсенді түрде насихатталып келеді.

Осы мәселе кеңестің отырысында қаралғанда мынадай ұсыныстар енгізілді:

• жөндеу жұмыстарын аяқтап, іргелес аумақты абаттандыру;
• Шойындыколь ауылында кітапхана ашу мүмкіндігін қарастыру;
• туристік карталарға сәйкес ауданның қасиетті жерлерін анықтау мен зерттеу жұмысын жалғастыру;
• оқушылар мен мекеме қызметкерлеріне арналған көшпелі іс-шаралар ұйымдастыру;
• Гастелло ауылының әкімімен бірлесе отырып, оқу залы үшін кітапхана аумағын кеңейту мүмкіндігін қарастыру.

Қоғамдық кеңес мүшелері мемлекеттік органдар ұйымдастыратын іс-шаралар мен кеңестерге белсене қатысады. Кеңес өкілдерінің аудан әкімдігі жанындағы түрлі комиссиялардың құрамына енуі оларды аудан өміріндегі маңызды үдерістерге тартып, өзекті мәселелерді талқылауға қатысуына мүмкіндік береді.

Кеңестің жұмысындағы маңызды қағидат – ашықтық. Кеңес туралы барлық ақпарат: құрамы, жұмыс жоспары, Ереже, отырыстар мен іс-шаралар жөніндегі есептер аудандық мәслихаттың ресми сайтында «Қоғамдық кеңес» бөлімінде жарияланады.

Ақпараттық кеңістік те белсенді қолданылады: Instagram және Facebook әлеуметтік желілерінде биыл 19 материал жарияланды.

Кеңестің жұмысы  www.kazkenes.kz  ақпараттық порталында да ұсынылған.

Аудандық «Целинное знамя» және «Жарқайың тынысы» газеттерінде 7 мақала жарияланып, «САРЫАРҚА» жергілікті телеарнасында Қоғамдық кеңестің жұмысы туралы тұрақты сюжеттер көрсетілуде.

Жартыжылдық қорытындысын жасай келе, Қоғамдық кеңестің жүйелі әрі нәтижелі жұмыс жүргізіп жатқанын атап өтуге болады. Кеңес мүшелері аудан тұрғындары үшін өзекті мәселелерді шешуге қатысып, әлеуметтік маңызы бар тақырыптар бойынша ұсыныстар мен бастамалар енгізуде. Алда – жоспарларды іске асыру, халықпен кері байланысты нығайту және басым бағыттар бойынша қоғамдық бақылауды күшейту міндеті тұр.

Фото

Previous Next