Қаланы абаттандыру бағдарламасы аясында қазір Кеншілер алаңындағы академик Қ.И.Сәтбаевтың ескерткішін қала әкімдігінің алдындағы алаңға көшіру жұмыстары жүргізілуде.

Сәтбаев қаласы бойынша бюджет қаражаты есебінен іске асырылатын жобаларды бақылау жөніндегі мониторингтік топ 9 шілде мәслихат төрағасы Қайрат Балмағамбетовтың басшылығымен осы және басқа да жұмыстардың орындалу барысына бақылау жүргізді. Мердігер ұйым ескерткішті механикаландырылған тәсілмен алып, орнын тазалау жұмыстарын жүргізуде; қоқыс шығарылғаннан кейін алаң тегістеліп, жабынды қабаты қалпына келтіріледі. Сонымен қатар ескерткіш жаңадан орнатылатын орын аумағы қазылып, бетон іргетасының негізі құйылып әзірленген.

Одан әрі депутаттар мен қоғамдық кеңес мүшелері Сәтбаев қаласы бойынша алаңдар мен скверлерде санитарияны қамтамасыз етуге міндеттеме алған «Қажмағанбет Ә.М.» жеке кәсіпкердің жұмысын бақылады. Келісім шартқа сәйкес ұйым жазғы уақытта бекітілген аумақтарды жинау, сыпыру, қоқыс жәшіктерін, гүлзрларды тазалау, шөптен тазалау жұмыстарын жүргізеді. Мониторинг топ мүшелері санитарияны қамтамасыз ету бойынша анықталған  бірқатар кемшіліктерді атап өтіп,  жұмыс сапасын арттыру бойынша ұсыныстар берді.     

Қаланы абаттандыру және санитариялық жағдайын жақсарту мақсатында биыл бюджет қаражаты есебінен қатты тұрмыстық және өнеркәсіптік қалдықтарды жинауға арналған 187 дана  еуроконтейнер сатып алынған. Контейнерлер тұрғын үй-коммуналдық шаруашылығы бөлімінің тапсырма-кестесі бойынша анықталған мекен-жайлардағы контейнер алаңдарына орнатылып, жұмыстың сапасы бақылауға алынады.

Фото

Previous Next