Тұрақты комиссияның отырысы

Қала бюджетінің атқарылуы туралы аудан әкімдіктері мен бөлімдердің есебі Ақтөбе қаласының Қоғамдық кеңесімен бірлесіп тұрақты комиссиялардың бірлескен отырысында тыңдалды.

Астана ауданы әкімдігінің 2024 жылғы бюджеті 4,1 млрд.тг. құрады. Оның ішінде 1,062 млрд.тг. «Халық қатысатын бюджет» бағдарламасы бойынша 44 жобаны жүзеге асыруға бағытталды. Олар ойын, спорт, футбол, баскетбол алаңдарын орнату, ауланы абаттандыру, т.б. жобалар.

1,18 млрд.тг. аудан аумағында санитарияны қамтамасыз ету бағытында жұмсалды. Қаражатқа 8 учаскеде 5 мердігермен тазалық жұмыстары жүргізілді, 844 евроконтейнер сатып алынды, 64 қоқыс алаңы жөнделді, дезинфекция, т.б. жұмыстары жүргізілді.

902 млн.тг. абаттандыру мен көгалдандыру жұмыстарына бағытталды – ағаштарды санитарлық кесу, тротуар салу, аншлагтар дайындау және орнату, арықтарды күтіп ұстау, архитектуралық нысандарды орнату.

542 млн.тг. 8 тұрғын алаптардағы 48 км жолдарға қиыршық тас төсеуге бағытталды. Су тасқынынан зардап шеккен 48 адамға 149 млн.тг. көмек көрсетілді.

Алматы ауданы әкімдігінің 2024 жылғы бюджеті 11,2 млрд.тг. құрады.

1,1 млрд.тг. санитарияны қамтамасыз ету жұмыстарына бағытталды. 7 учаске бойынша 4 мердігердің, қоқыс шығаруға жауапты 2 мердігердің қызмет көрсету шығыстары, 35 қоқыс алаңдарын жөндеу, стихиялық қоқыс үйінділерін әкету, т.б. жұмыстар.

«Халық қатысатын бюджет» бойынша жоспарланған 35 жобаның 18-і іске асырылған. Жұмсалған қаражат 445,8 млн.тг. Қалған 17 жоба бойынша жұмыстардың сапасыз болуына байланысты мердігерді жозықсыз деп тануға қатысты сот процесі жүргізілуде.

257,9 млн.тг. абаттандыру және көгалдандыру жұмыстарына: жасыл желектерді өңдеу, аншлагтарды дайындау және орнату, ағаштарды санитарлық кесу, арықтарды күтіп ұстау, тротуарларды төсеу, т.б.

11 тұрғын алаптардағы 57,3 км қара жолдарға қиыршық тас төсеуге 317,3 млн.тг. жұмсалды. Су тасқынынан зардап шеккен 2978 адамға барлығы 8,3 млрд.тг. көмек көрсетілді.

Отырыста Жер қатынастары, сәулет және қала құрылысы, Ауыл шаруашылығы бөлімдерінің де есептері қаралды. Депутаттар мен Қоғамдық кеңес мүшелері жобалардың сапасын бақылау, абаттандыру ережелерін бұзған азаматтарға қатысты шараларды күшейту бойынша ұсыныстарын берді.

Фото

Previous Next