МЕМЛЕКЕТТІК ҚЫЗМЕТТЕРДІ БАҚЫЛАУ ЖӘНЕ МОНИТОРИНГ ҚАҒИДАТТАРЫ

 МЕМЛЕКЕТТІК ҚЫЗМЕТТЕР САПАСЫНА МЕМЛЕКЕТТІК БАҚЫЛАУДЫ ЖӘНЕ ҚОҒАМДЫҚ МОНИТОРИНГТІ ЖҮРГІЗУ ЗАҢДЫЛЫҚ, БЕЙТАРАПТЫҚ, АНЫҚТЫҚ, ЖАН-ЖАҚТЫЛЫҚ, АШЫҚТЫҚ ҚАҒИДАТТАРЫНА НЕГІЗДЕЛЕДІ. 

24 шілде күні Жамбыл облыстық Қоғамдық кеңесінің кезекті отырысы ҚР мемлекеттік істер агенттігінің Жамбыл облысы бойынша департаментінің мемлекеттік көрсетілетін қызметтер басқармасының басшысы Бауыржан Кенжекулов, онлайн форматта аудандық Қоғамдық кеңестер төрағаларының қатысуымен өткізіліп, күн тәртібінде а.ж. 1-ші жартыжылдығында көрсетілген мемлекеттік қызметтер бойынша бағалау көрсеткіштері және мемлекеттік қызметтер көрсету саласындағы заңнаманың сақталуы бойынша бақылау шаралары туралы есеп тыңдалды. 

Облыс әкімі аппаратының мемлекеттік көрсетілетін қызметтерді мониторингілеу бөлімінің басшысы Диана Искакова жергілікті атқарушы органдармен көрсетілетін 309 мемлекеттік қызметтер түрі бойынша 6 786 054 мемлекеттік қызметтер көрсетілгенін, қызметтердің 99,29% электронды түрде көрсетілгеніне тоқталды. 

Азаматтардың мемлекеттік қызметтер сапасына, қолжетімділігіне және процестердің ашықтығына қатысты қанағаттану деңгейін бағалау мақсатында мемлекеттік қызметтер сапасына жүргізілген қоғамдық мониторинг нәтижелері көрсеткендей, Жамбыл облысы бойынша зерттелген 17 қызмет түрінің сапасына респонденттердің 77,6% толық қанағаттанып, жалпы көрсеткіші 4,66 баллды құраған. 

ҚР Президентінің Жарлығына сәйкес жыл сайын өткізілетін жергілікті атқарушы органдардың мемлекеттік қызметтер көрсету сапасының тиімділігін бағалау қорытындысы бойынша 2024 жылы Жамбыл облысы өңірлер арасында 2-ші орынды иеленген (жалпы балл - 93,05). 

Бөлім басшысы Диана Ілиясқызы атап көрсеткендей, облыс әкімі аппаратымен мемлекеттік қызметтердің уақытылы көрсетілуін қамтамасыз ету, заң бұзушылықтарды болдырмауға күнделікті мониторинг жүргізудің нәтижесінде мемлекеттік қызметтер көрсету барысында 2024 жылдың қорытындысы бойынша облыста 33 мерзім бұзу фактісі тіркелсе, ал 2025 жылдың 1-ші жартыжылдығында 1 ғана факт орын алған ( өткен жылмен салыстырғанда мерзім бұзу оқиғалары 30 есеге азайған). 

Кеңес отырысында ҚР “Қоғамдық кеңестер туралы” Заңына сәйкес облыс әкімдігінің табиғи ресурстар және табиғат пайдалануды реттеу басқармасы, мәдениет және тілдерді дамыту басқармаларының мемлекеттік көрсетілетін қызметтерді, мемлекеттік бағдарламаларды іске асыруы, ҚР заңнамасының нормаларын қолдану нәтижесінде азаматтар үшін теріс салдарларды және қоғамдық мүдделерге қысым жасалуын анықтау мақсатында а.ж. ақпан-шілде айларында жүргізілген қоғамдық мониторинг нәтижелері бойынша қорытындысы жан-жақты баяндалды. 

Мониторингтік топ мүшесі Әуесхан Зәуірбеков кәсіпкерлік қызмет мақсатында балықтардың өсімін жасанды молайту және өсіру жөніндегі бағыт - Балық өсіру шаруашылығын дамытудың 2021-2030 жылдарға арналған бағдарламасына сәйкес Жамбыл облысында асыл тұқымды балық өсіруді дамыту, акваөсіру өнімдерінің сапасын және өнімділігін арттыруды субсидиялау түрінде мемлекеттік қолдау шаралары 2024 жылы Жамбыл, Меркі, Шу, Т. Рысқұлов, Қордау аудандарының барлығы 22 шаруа қожалықтарына 189 млн 156 мың теңге көлемінде көрсетілгенін атап өтті. 

Баяндамашы Жамбыл ауданында балық шаруашылығымен айналысатын 11 шаруа қожалықтарына жалпы сомасы 100 млн. теңгеге жуық субсидия көлемі бөлінгенін айта келе, кәсіпкерлер тарапынан аталған мақсатта жер телімін пайдалану, жеңілдетілген несие алу, инкубациялық цех ашу жөнінде сұрақтар көтерілгеніне тоқталды. 

Күн тәртібі бойынша облыс әкімдігінің мәдениет және тілдерді дамыту басқармасына маусым-шілде айларында жүргізілген қоғамдық мониторинг қорытытындысын баяндаған кеңестің білім беру, денсаулық сақтау, мәдениет, спорт, жастар саясаты және жұмыспен қамту жөніндегі комиссиясының төрағасы Сұлушаш Құрманбекова облыста мәдениет және тілдерді дамыту саласындағы мемлекеттік саясатты іске асыру бағытында 504 мекеме жұмыс жасайтыны, облыстың даму жоспары бойынша белгіленген 3 индикатордың орындалу көрсеткіштері, басқарма тарапынан көрсетілетін 3 мемлекеттік қызмет бойынша сұраныстар туралы айтып өтті. 

Мониторингтік топ жетекшісі Сұлушаш Сатбекқызы қоғамдық бақылау барысында анықталған мәдениет саласындағы өзекті мәселелерге тоқталып, қоғамдық қабылдауға келген 35 азаматтың басым бөлігі мәдениет саласының техникалық қызметкерлеріне еңбек демалысы кезінде сауықтыру ақысы төленбейтіні, ауылдағы мәдениет үйлері мен клубтарының кіші техникалық қызметкерлеріне 25% үстемақы төленбейтіні, кітапханалар жүйесінде бас бухгалтер, бухгалтерлерге ауылдық квота қарастырылмауы туралы өтініштер бергенін атап айтты. 

Басқарманың 2025-2027 жылдарға арналған бюджеттік бағдарламасында балалар мен жасөспірімдерге арналған шығармашылық үйірмелерге берілген мемлекеттік тапсырыс шеңберінде 1 шілдеге дейінгі жағдай бойынша 35 үйірме бойынша 6711 ваучер 56 өнім берушіге берілгені, жан басына шаққандағы нормативтік қаржыландыру арқылы 2024 жылы 1 291 200,0 тг., 2025 жылы 1 339 200,0 тг қарастырылғаны айтылып, алайда мемлекеттік сатып алу арқылы жүргізілетін бәсекелестік қызмет түріне жататын бірыңғай ақпараттық жүйені қолдану барысында туындаған бірқатар қиындықтар сыбайлас жемқорлық тәуекелдерінің орын алуына жол беретіні қозғалды. 

Қоғамдық кеңес төрағасы Дүйсеналы Бықыбаев күн тәртібіндегі сұрақтарды қарастырып, қызу талқылаған кеңес мүшелері Р.Рахманбердиев, Б.Құлекеев, Ж. Омаров, Ә.Жұмабаев, Т.Жолтаев, 
С.Сейтбеков, А.Досмаханбетұлы, А.Төлебаев, М.Мамышевтің ұсыныстарының шешімдер қабылдауда ескерілетінін атап өтіп, кеңес мүшелеріне және отырысқа қатысқан басқарма басшыларының орынбасарлары, жауапты мамандардың назарына қоғамдық мониторинг қорытындылары негізінде бақыланған нысандардың тиімділігін арттыру, нормативтік құқықтық актілерге өзгерістер мен толықтырулар енгізу жөніндегі қабылданған ұсыныстар тиісті мемлекеттік органдардың қарауына жіберілетінін жеткізді. 

Қоғамдық кеңес отырысы туралы толық сюжет “JAMBYL TV” телеарнасы арқылы “AIQYN AQPARAT” жаңалықтар топтамасында көрсетілді.

Фото

Previous Next