Қоғамдық кеңестің кезекті отырысында

4 маусым 2025 жылы Зайсан аудандық Қоғамдық кеңесінің жоспарлы кезекті отырысы болып өтті. Отырысқа Қоғамдық кеңестің он бес мүшесінің он төрті қатысты. Күн тәртібіндегі бірінші мәселе « Зайсан ауданының әлеуметтік экономикалық дамуының барысы туралы» аудан әкімінің орынбасары Р.Рамазанов баяндама жасады. Аудан экономикасының дамуының негізгі көрсеткіштерінің, бюджет түсімдерінің асыра орындалуы, әлеуметтік нысандардың, инженерлік инфрақұрылымдардың көптеп салынуы, әсіресе ауылдарда бірінші рет дәрігерлік амбулаториялар мен пункттердің жаңадан салынып, жаңа құрал - жабдықтармен жабдықталуы және тағы да басқа ауданның әлеуметтік экономикалық саласында атқарылып жатқан игі істерді Қоғамдық кеңес мүшелері қанағаттанарлықпен қабылдады. Қоғамдық кеңестің алқа мүшесі Қ.Сайранов ауданда жақсы жұмыстар атқарылып жатқанын атап өтіп, сонымен бірге аудандағы жергілікті мемлекеттік басқару органдары тек қана ауданның ішкі жұмыстарымен айналыспай, ауданға келіп жұмыс істеп жатқан шетел инвесторларының жұмыстарына назар аудару керектігін айтып өтті. Аудандағы табиғи газдың негізгі қорының шетелге сатылып кетіп, аудан халқының газға толық қолы жетпей отырғанын, бұған бұрынғы жергілікті мемлекеттік басқару органдарының басшыларының мән бермегендігінен осындай жағдай орын алып отырғанын айтты. Келешекте мұнай, көмір, мыс өндіруші шетел инвесторларының бизнес бағдарламаларымен жергілікті мемлекеттік басқару органдары танысуы керектігін, оларға ауданның әлеуметтік экономикалық дамуын жақсарту бағытында өз талаптарын қойып, туған жердің байлығының , Тұғылға дейін салынатын темір жол құрылысының пайдасын аудан халқы көру керектігін айтып өтті. Қоғамдық кеңес төрағасы М.Уәли Жаңатұрмыс жолының орташа жөндеу жұмыстарының тым созылып кеткенін, сондықтан уақытты созбай бітіру керектігін айтса, Қоғамдық кеңес мүшесі М.Бошаков Қызылқия жолын жөндеу қажеттігін айтты. Басқа да Қоғамдық кеңес мүшелері үлкен елді мекендер арасында жүргізіліп жатқан жол жөндеу жұмыстарының дұрыс екендігін, бірақ аудан экономикасының дамуына тікелей қызмет етіп отырған аудан ішіндегі шаруашылық жолдарын да назарда ұстап жөндеу керектігін атап өтті. Қоғамдық кеңес мүшелері аудандағы Кендірлік, Үйдене суландыру жүйелерін салу, жөндеу жұмыстарының басталуының тағыда созылып бара жатқанын, осы мәселемен тікелей айналысып жүрген мамандар жоқ екендігіне қынжылыс білдірді. Қоғамдық кеңес мүшесі Қ.Сайранов ауданның осындай проблемаларды шешу мақсатында ауданға келетін Парламент депутаттарымен жергілікті мемлекеттік басқару органдары басшыларымен, облыстық және аудандық мәслихат депутаттарымен, Қоғамдық кеңес мүшелерімен бір дөңгелек үстел ұйымдастыру керек деген ұсыныс айтты. Ұсыныс Қоғамдық кеңес мүшелері тарапынан қолдау тапты.
Күн тәртібіндегі екінші мәселе «Ауданішілік және Зайсан қалаішілік жолаушылар тасымалдаудың жағдайы туралы» мәселе бойынша аудандық тұрғын үй коммуналдық шаруашылық, автомобильдер жолдары және жолаушылар тасымалдау бөлімінін басшысы Ә.Жумағалиевтің және осы жұмыстарды орындаушы кәсіпкер Р.Маматовтың хабарламалары тыңдалды.
Қоғамдық кеңес төрағасы М.Уәли ауданішілік және Зайсан қалаішілік жолаушылар тасымалдауды субсидиялауға 45 млн тенге, азаматтардың кейбір топтарының, оқушылардың жүруіне 23 млн тенге, жиыны 68 млн тенге бюджет қаражаты бөлініп отырғанын, алайда жақында Қоғамдық кеңес мүшелері жүргізген қоғамдық бақылауда көліктердің жүру жиіліктерінің сақталмайтындығы, тағы басқа кемшіліктер анықталғанын, тұрғындар тарапынан жолаушылар тасымалдау бойынша наразылықтар орын алғанын айтып өтті. Кәсіпкер Р.Маматов өз кезегінде беріліп отырған мемлекет тарапынан беріліп жатқан көмек қаражаттар және билет сатудан түсіп отырған қаражатттар мекеменің тек тікелей шығындарын әрең жабатынын, көлік паркін жаңалауға, күрделі жөндеуге қаражаты жоқ екендігін айтты.Сондықтан келешекте жолаушылар тасымалдау тоқтаусыз жүру үшін осы мәселені экономикалық есеп жасап қайта қарауды ұсынды.
Қоғамдық кеңес төрағасы М.Уәли бұл мәселе алдағы уақытта да Қоғамдық кеңестік алқа мүшелерінің назарында болатынын, ауданішілік және қалаішілік жолаушылар тасымалдауды субсидиялау шығындарын тиісті құзырлы мекемелерді қатыстыра отырып қайта қарауды, мердігер мекеме тек субсидияға иек артпай, кәсіпкер ретінде жолаушылар тасымалдау толқынын арттыру, ол үшін халық арасында өз жұмысын жарнамалау, халыққа тиімді қызмет ұсыну, жасанды интеллект қызметін енгізу, тағы да басқа кәсіпкерлік алғырлықты іске қосу керектігін, осы жұмысты сапалы жыл аяғына дейін тоқтатпай жүргізуді ұсынып , жас кәсіпкердің жұмысына табыс тіледі.
Күн тәртібіндегі үшінші мәселе Зайсан қаласын көгалдандыру және көркейту мәселесі бойынша қала әкімі Р.Тауасаров қысқаша хабарлама жасады. 
Қоғамдық кеңес төрағасы М.Уәли осы мәселені дайындау барысында қаладағы саябақтар мен скверлердің жағдайын Қоғамдық кеңес мүшелерінен құрылған топ қарап шыққанын, саябақтар мен скверлердің ағаштарын суару жұмыстарының төзгісіз жағдайда екендігін, жалпы саябақтар мен скверлерді ұстау мәселесі бір жолға қойылмағанын айтып өтті. Қала әкімі Р.Тауасаровқа орын алған кемшіліктерді тез арада жоюды, аудан әкімінің орынбасары Н.Қабидолдинаға саябақтар мен скверлерді ұстау тәсілін, қаржыландыру мәселесін қайта қарап шешуді ұсынды.
Күн тәртібіндегі төртінші мәселе «2025 жылы балалардың жазғы демалысын, сауықтырылуын және еңбекпен қамтылуын ұйымдастыру туралы» аудандық білім бөлімінің басшысы Е.Келгенбаев хабарлама жасады. Алайда балалардың жазғы дем алысын ұйымдастыру жөніндегі аудандық білім бөлімінін жоспары Қоғамдық кеңес мүшелерінің көңілінен шықпады. Әсіресе балалардың жазғы демалысын ұйымдастыру мақсатында салынған «Бәйтерек» спорттық сауықтыру лагерінің әлеуетінің толық пайдаланбауы, оның тамыз айында ашылатыны онда 7 күндік екі аусымда 150 ғана бала демалатыны көп сұрақтарды туындатып отыр. Қоғамдық кеңестің алқа мүшесі Қ.Сайранов білім саласының облыстық бюджет тарапынан қаржыландыруы дұрыс емес екендігін, Зайсан ауданы сияқты шет аудандарға балалардың демалысына жалпы білім саласына жеткілікті қаражат бөлінбейтінін айтып аудандық Қоғамдық кеңес тарапынан облыстық білім бөліміне арнайы хат жолдауды ұсынды. Ұсыныс Қоғамдық кеңес тарапынан қолдау тапты. Аудандық Қоғамдық кеңес төрағасы М.Уәли бұл мәселе аудандық Қоғамдық кеңестің алқа мүшелерінің үнемі назарында болатыны, тамыз аяғында балалардың демалысының қорытындысы бойынша мәселе алқа отырысында қайта қаралып, қорытындысы облыстық білім бөліміне жолданатынын жеткізді. 
Аудандық Қоғамдық кеңес қаралған мәселелер бойынша ұсыныс шешімдер қабылдады.   

Фото

Previous Next