Маңғыстау аудандық Қоғамдық кеңесінің жаңа құрамы бекітілді

Маңғыстау аудандық мәслихатының төрағасы Е. Махмутов Маңғыстау ауданының Қоғамдық кеңесінің жаңа құрамын бекітті.

Қоғамдық кеңес – мемлекеттік органдардың шешім қабылдауына азаматтық қоғам өкілдерінің қатысуын қамтамасыз ететін консультативтік-кеңесші, байқаушы орган. Бұл кеңес өңірлік саясаттың ашықтығын арттыруға, жергілікті басқару жүйесінде қоғамдық пікірді ескеруге бағытталған. Қоғамдық кеңес өз жұмысын Қазақстан Республикасының «Қоғамдық кеңестер туралы» Заңы аясында жүргізеді.

Жаңа құрам қалай қалыптасты?

2022 жылы құрылған Қоғамдық кеңестің өкілеттік мерзімі аяқталуына байланысты 2025 жылдың 8 қаңтарында аудандық мәслихат жаңа құрамды қалыптастыру жөніндегі жұмыс тобын құру жұмыстарын бастады. Кеңес құрамын бекіту процесі ашық өтті – барлық қажетті ақпараттар ресми интернет-ресурстарда, әлеуметтік желілерде және жергілікті «Жаңа өмір» газетінде жарияланды.

Жұмыс тобы 7 адамнан құрылды, оның 2-і мемлекеттік органдардан, 5-і азаматтық қоғам өкілдері. Есепті кезеңде жұмыс тобының үш отырысы өтті.

2025 жылдың 20 қаңтары мен 31 қаңтары аралығында кеңес мүшелігіне үміткерлерден құжаттар қабылданды. Нәтижесінде 19 азамат өтініш білдірді. Кейін кандидаттармен әңгімелесу өткізілді, оған 17 адам қатысты.

Әңгімелесу нәтижесінде 15 азамат Қоғамдық кеңес құрамына, ал 2 азамат резервтік тізімге енгізіліп, бекіту үшін аудандық мәслихат төрағасына ұсынылды.

Осы ұсыныс негізінде Маңғыстау аудандық Қоғамдық кеңесінің жаңа құрамы ресми түрде бекітіліп,алғашқы отырысы өткізілді.
Қоғамдық кеңестің алғашқы отырысында кеңес мүшелерінің басым дауысымен кеңестің төрағасы болып Төлепбергенов Қанат Берекетұлы сайланды.

Фото

Previous Next