Ағымдағы жылдың 19-шы тамызында Қонаев қаласындағы Балаларды қолдау орталығына Алматы облысы Қоғамдық кеңесі екінші мәрте жол тартты.

Балалардың  сұраныстары қанағаттандырылды

Ағымдағы жылдың 19-шы тамызында Қонаев қаласындағы Балаларды қолдау орталығына Алматы облысы Қоғамдық кеңесі екінші мәрте жол тартты. Бұл жолы балалардың өздері сұраныс еткен кітаптарын арнайы әкеліп, жекелеп өздеріне үлестіріп берді.  

Естеріңізге сала кетейік, осығанға дейін шілденің аяғында Қоғамдық кеңес төрағасы Қ. Дауталиев бастап, мүшелері қостап Балаларды қолдау орталығына барып, олардың әрқайсының жас ерекшеліктеріне сай кітаптар сыйлаған болатын. Ол туындылардың 60% - қазақ,  30% - шетел және 10% - орыс шығармашылығы болды. Балалар орталығындағы жаңа ашылған кітапхана залына алғашқылардың қатарында болып, Қоғамдық кеңес мүшелері әкелген 60 кітап табыс етілген-ді.

Сол кездесу барысында Қоғамдық кеңес төрағасы Қазыбек Дауталиев: «Президент Қ. Тоқаевтың Ұлттық құрылтайдың IV отырысында берген тапсырмаларының бірі «Балалар кітапханасы» мен «Біртұтас тәрбие» бастамалары аясындағы іс-шараның өтуіне мұрындық боламыз әрі алдағы уақытта балаларға жиі келіп не оқығандары туралы дискуссия жасап, кітап қорын толтырып тұруды тікелей миссия етіп аламыз» - деп, уәде еткен еді. «Уәде – Құдай сөзі» болумен қатар, ең бастысы барша балғындардың аппақ сенімдеріне титтей селкеу түсірмей, айтылған сөзді жерге қалдырмай, аманатты орындау – адамзат алдындағы ең ұлық іс болса керек.

Бұл жолы кіп-кішкентай Аня «Букварь» алып, кәдімгідей құнжыңдап қуанып қалды. Өлеңсүйер Алтынайдың қолына Мұқағалидың «Үш бақыты» тиіп, оның да төбесі көкке бір елі тимей қалғандай, ризашылығын білдірді. «Легенды и мифы древней Греции» туындысы бұйырған Николай өткенде алған Б. Соқпақбаевтың «Менің атым Қожасының» орысша нұсқасын оқып бітіргенін, мазмұнын қысқаша айтумен дәлелдеп берді. Мұны көріп, еңбектің бағаланғаны деп бір қуанып қалдық. Өйткені, әрбір әкелген кітап оқылса, ол – теңдессіз үлкен олжа, басты міндетіміздің орындалғаны деп білеміз. Ал, Әлихан есімді бозбала М.Дулатовтың «Оян, қазағына» тапсырыс берген еді, сұранысы мен атына қарап, мықты азамат болып өсеріне бек сендік һәм тілеуін тіледік. Әлемдік бестселлер Гарри Потердің 7 томдығына ие болған жас жігіт өзгелермен бөлісетін айтты. Сонымен қатар, «Моя книга рецептов», «Мой день в школе» сынды туындылар да өз иелерін орынды тапты.

 Осылай Алматы облысы Қоғамдық кеңесінің төрағасы, ҚР Президенті жанындағы Ұлттық құрылтай мүшесі Қазыбек Дауталиев пен Қоғамдық кеңестің мүшелері - Зинаш Күштекова, Рахатулла Тезекбаев, Мөлдір Иманмәди келіп, білімге ұмтылған жас өрендерді тағы бір мәрте қуантып қайтты. Айта кету керек, барлық алынған тәрбиелік өнімдердің бұл жолғы да демеушісі - Қоғамдық кеңестің белсенді мүшесі, медицина ғылымдарының кандидаты Зинаш Көпжасарқызы.

Міне, «балалар – болашағымыз» деп құр желеу сөз айта бергенше, Алматы облысы Қоғамдық кеңес мүшесінің төрағасы һәм мүшелері сияқты әрдайым өстіп нақты іспен дәлелдеп, қоғамға шынымен пайдасын тигізу шарт. Кітап алған балалар да, оны берген тарап та көңілдері тоқ болып, келесі кездесуге дейін деп қош айтысып, жүздері бал-бұл жанып тарқасты.   

Фото

Previous Next