Қазкеңес жаңалықтары

ИНДЕР АУДАНДЫҚ ҚОҒАМДЫҚ КЕҢЕСІНІҢ КЕЗЕКТЕН ТЫС ОТЫРЫСЫ

2025 жылдың 02 қазанында аудандық қоғамдық кеңестің төрағасы Ж.Дауталиевтің төрағалығымен Қоғамдық кеңестің кезектен тыс отырысы өтті.

Кеңес отырысына аудан әкімінің міндетін атқарушы Ә. Оразғалиев, аудандық мәслихат депутаттары, кент әкімі, дербес бөлімдер мен тиісті мекеме басшылары және баспасөз өкілі қатынасты.

Отырыстың күн тәртібінде – Индербор кентіндегі көпқабатты тұрғын үйлердің жылу тарифін көтеру мәселесі қаралды.

«Таңат» ПИК төрағасы Б. Ілиясов хабарлама жасап, 2021 жылы көпқабатты үйлердің тұрғындарымен жиналыс өткізіліп, жылу тарифі 122 теңге болып бекітілгенін айтты. Содан бері төрт жыл ішінде тариф өзгеріссіз қалып отыр. Ал 2025 жылы коммуналдық қызметтердің бағасы 2 есеге жуық өскендіктен, мекеменің шығындарын жабу қиындаған. Осыған байланысты тарифті 310 теңгеге көтеру ұсынылды.

Б. Ілиясовтың айтуынша, ПИК тұрғындарды үздіксіз жылумен қамтамасыз етіп отыр, банк қосымшасы арқылы төлем жасау мүмкіндігі енгізілген, дегенмен кейбір тұрғындар тарапынан берешектер бар. Алдағы уақытта қалыпты жұмыс жасау үшін тарифті қайта қарау қажеттігі туындаған.

Жылу тарифін көтеру мәселесі Таңат ПИК тарапынан бұған дейін де Қоғамдық кеңеске бірнеше рет ұсынылған болатын. Алайда Кеңестің тарифті бекітуге немесе көтеруге өкілеттігі жоқ екені түсіндіріліп, Кеңестің кеңесші-консультативтік орган ретінде ғана қызмет атқаратыны, сонымен қатар «Таңат» ПИК табиғи монополия субъектісі ретінде тіркелмегендіктен, тарифті өзгерту тек тұрғындар мен ПИК арасындағы келісім арқылы ғана жүзеге асырылатыны ресми хатпен хабарланған еді.

Отырыста ұсынылған тарифтің тұрғындар жағдайына әсері мен негізділігі талқыланып, пікір алмасулар болды.

Қоғамдық кеңес тұрғындардың әлеуметтік жағдайын және коммуналдық қызметтердің өсуін ескере отырып:

тарифті бірден 310 теңгеге емес, 220 теңгеге түсіруді;

заң талаптарына сәйкес бұл соманы тұрғындармен келісіп, келісімшарт арқылы рәсімдеуді ұсынды.

Алдағы уақытта тұрғындардың әлеуметтік жағдайын ескере отырып, өзге коммуналдық төлемдерде қарастырылған субсидияны жылу төлеміне де енгізу тетіктерін қарастыру мәселесі де көтерілді.

Фото