Кітаппен азықтанатын жасөспірімдер

Кітаппен азықтанатын жасөспірімдер

21-ші қазан күні Қонаев қаласындағы Балаларды қолдау орталығына Алматы облысы Қоғамдық кеңесі үшінші мәрте кітап әкелді. Үшінші мәрте деуіміздің себебі, осыған дейін екі рет Балаларды қолдау орталығына барып, олардың әрқайсының жас ерекшеліктеріне сай кітаптар сыйлаған болатын. Айта кетейік, содан бері балалармен жүздесу тұрақты түрде дәстүрге айналып отыр.
Қоғамдық кеңестің төрағасы Қазыбек Дауталив пен оның мүшелері Зинаш Куштекова, Риза Саурбаева, Мөлдір Иманмәди арнайы барып, балалармен мәре-сәре болды. 
Осыған дейінгі кездесуде балалар оқығысы келетін кітаптардың тізімін берген еді. Сол тапсырыс өз деңгейінде жүзеге асты. 11 жасар Денис ғажайыптарды жақсы көргендіктен, фокусниктер туралы туындыны алса, Диар мен Сергей болашақта полиция болуды армандап, сол мамандықтың кітаптарын иеленді. Ал Әлихан болса, өзінің есімін тектен-тек қойылмағанын біліп, алаш зиялысы Бөкейханов туралы көбірек білгісі келетінін жеткізген. Өзіне тарту етілген кітаптарды көріп, қуанғаннан төбесі көкке бір елі жетпей қалды. Нұржанды өткен тарих қызықтырады екен, ол М.Дулатовтың «Бақытсыз Жамалын» оқуды мақсат тұтыпты. Әнге жаны құмар Николай «школьные песенки» кітабын, дәрігерлер туралы туындыны Нұржан еншіледі. 5 жасар Айсұлтан әдемі суреттермен көмкерілген құрастырғыш кітапшасы қолына тигеннен, ары-бері құрастырып әлек боп қалды. Зомбилер туралы қорқынышты әлемді ұнататын Қуаныш та, астрономия қызықтыратын Дамир дегендерін қолына тигізді. 
Үріп ауызға салардай, нәзіктік пен сұлулықтың символы болған қыздар жағы, табиғат берген болмысынан алшақтамақты. Кір шалмаған аппақ көңілдері жанына жақын туындыларымен қауышты. Поэзияға біртабан жақын Раина Абай шығармаларын оқумен қатар, анаға қатысты кітапты оқуды мақсат тұтса, Іңкәр «Өзіңді бағала», Нұрай «Өмірдің аты М» деген туындылармен сусындамақ. Жалпы, балалар әлемдің бестселлер Гарри Потерді жақсы білумен қатар, терең түсіну үшін оқығысы келетіндерін әр барған сайын алады. Өткенде орысша 7 томдық Гарри Потер кітапхана сөресіне түссе,  осы жолы қазақшасымен толық жеткізілді. 
   Осындайда, «оқимын деген ұрпақ болса, кітап беруге әзір алдыңғы толқынның» бары жанға қуат береді. Қалауын тапса, қар жанар дейміз ғой. Расында да. Кітап оқытудың түрлі тәсілі бар, тек соның көзін таба білу керек. Балалармен кездесу барысында Қоғамдық кеңес мүшелері емен-жарқын сөйлеседі. Сұрақ-жауап бөлімін жасайды. Жасөспірімдердің қалауын мұқият қадағалайды. Оқыған туындыларының мазмұнын сұрайды. «Мен үлкенмін, шен-шекпенім бар» демейді. Сол алаңғасар балалық шаққа бірден саяхат жасап кетеді. Мұндағы ұтқан тұс – осы айрықша қарым-қатынас.   
Президент Қ. Тоқаевтың Ұлттық құрылтайдың IV отырысында берген тапсырмаларының бірі «Балалар кітапханасы» мен «Біртұтас тәрбие» бастамалары аясындағы іс-шараның өткізу болса, айтқан іс орындалды дей беріңіз. Бір оқпен екі қоян атып, әрі елбасы тапсырмасын жүзеге асырып, әрі балаларды рухани бақытты ете білу де – үлкен еңбек. 
Алматы облысы Қоғамдық кеңестің миссия әлі де өз жалғасын таппақ. Өйткені, бұл жиын да балалардың басқа аманаттарын арқалап алды. Оны уақытында тағы Сізбен бөлісерміз, көзі қарақты қымбатты оқырман!

Фото

Previous Next