Қазкеңес жаңалықтары

Жаркент қаласында Жетісу облыстық Қоғамдық кеңесінің көшпелі отырысы

2025 жылғы 30 қазан күні Жетісу облыстық Қоғамдық кеңесінің төрағасы Қыдырманов Әсет Серікқалиұлының жетекшілігімен Жаркент қаласында облыстық Қоғамдық кеңестің көшпелі отырысы өткізілді.
Көшпелі отырыстың негізгі мақсаты – өңір тұрғындарын толғандырып жүрген өзекті мәселелерді талқылау, олардың шешу жолдарын қарастыру және жергілікті билік пен қоғам арасындағы байланыс тетіктерін нығайту болды.
Күн тәртібінде қаралған мәселелер:
1.    Жол қауіпсіздігін қамтамасыз ету.
Қорғас – Жаркент бағытындағы мектептер мен халық көп шоғырланатын аумақтар маңында көлік қозғалысының қауіпсіздігін арттыру мақсатында «Сергек» бейнебақылау камераларын орнату мәселесі қаралды. Бұл шара жол-көлік оқиғаларының алдын алу және балалардың қауіпсіздігін қамтамасыз етуге бағытталған.
2.    Ауыр жүк көліктерінің қозғалысын реттеу.
Жаркент қаласы арқылы өтетін ірі жүк көліктерінің санының артуына байланысты, олардың қозғалысын автобан (негізгі айналма жол) арқылы шектеу жөнінде ұсыныс айтылды. Кеңес мүшелері ауыр техника қозғалысының қала ішіндегі жолдарға тигізетін кері әсерін, экологиялық жағдайға және жол сапасына ықпалын атап өтті.
3.    Қалалық көлік қозғалысын оңтайландыру.
Жаркент қаласындағы негізгі көшелерде көлік қозғалысының артуына байланысты қосымша бағдаршамдар орнату қажеттілігі көтерілді. Бұл бастама жол қозғалысын реттеп, кептелістердің алдын алуға, сондай-ақ жаяу жүргіншілердің қауіпсіздігін арттыруға бағытталған.
4.    Әлеуметтік қолдау және азаматтардың жеке өтініштері.
Отырыста жергілікті тұрғын Кәндекбанова Гүлзира Хусаиновнаның мүгедектік мәртебесін қайта қарау туралы жеке өтініші қаралды. Бұл мәселе бойынша тиісті уәкілетті органдарға нақты тапсырмалар беріліп, азаматтың өтінішін заң аясында қарау ұсынылды.
Қорытынды сөзінде облыстық Қоғамдық кеңестің төрағасы Әсет Серікқалиұлы Қыдырманов мұндай көшпелі форматтағы кездесулердің маңыздылығына тоқталып, қоғам мен билік арасындағы ашық диалогтың тиімділігін атап өтті. Сондай-ақ, тұрғындар тарапынан айтылған ұсыныстар мен көтерілген мәселелер кеңес бақылауында болатынын жеткізді.

Фото