Ағымдағы жылдың 30 қазан күні Маңғыстау облыстық Қоғамдық кеңесінің кезекті отырысы Бекмұрат Қыдырбайұлы Жүсіповтың төрағалығымен өтті.

Күн тәртібінде келесі мәселелер қаралды:
    •    Маңғыстау облысының ауыл шаруашылығы және жер қатынастары басқармасының есебі – «Ауыл шаруашылығын дамыту туралы»;
    •    Маңғыстау облысының энергетика және тұрғын үй-коммуналдық шаруашылық басқармасының есебі – «Облыс бойынша жылыту маусымына дайындық туралы».

Отырыста кеңес мүшелері өңірдің әлеуметтік-экономикалық дамуына қатысты маңызды мәселелерді талқылады. Әсіресе, 2024–2025 жылдарға арналған ауыл шаруашылығы саласындағы бюджет қаражатының игерілуі ерекше назарда болды. Кеңес мүшелері ірі қаржыландыру алатын ұйымдарға – балық шаруашылықтары мен құс фабрикаларына барып, олардың нақты жұмыс барысымен және қаражаттың тиімді жұмсалуымен танысу жөнінде ұсыныс айтты.

Сонымен қатар, жылыту маусымына дайындық барысы да кеңінен қаралды. Бірқатар шағынаудандарда жылудың әлі қосылмағаны айтылып, бұл мәселе тұрғындар үшін өзекті екені атап өтілді. Жылу үшін төлем тек нақты қосылған күннен бастап есептелетіні, барлық деректер арнайы тіркелетіні түсіндірілді.

Отырыста сондай-ақ «МАЭК-Қазатомөнеркәсіп» ЖШС-нің жағдайы талқыланды. Бұл кәсіпорын облысты электр энергиясымен, жылумен және ауыз сумен қамтамасыз ететін стратегиялық нысан болып табылады. Кеңес мүшелері жабдықтардың тозу деңгейі, жөндеу және жаңғырту жұмыстарының барысы, сондай-ақ бөлінген қаражаттың игерілуі туралы сұрақтар қойып, осы бағытта нақты шаралар қабылдаудың маңыздылығын атап өтті.

Қоғамдық кеңес мүшелері өңірдің дамуы жолында ашықтық, қоғамдық бақылау және тиімді өзара іс-қимылдың маңызын ерекше атап өтті.

Фото

Previous Next