ІШКІ САЯСАТ - ЕЛДІ ТҰРАҚТЫ ДАМЫТУ ҮШІН МЕМЛЕКЕТТІК ИНСТИТУТТАРДЫ ЖҰМЫЛДЫРУҒА ЖӘНЕ НЫҒАЙТУҒА АРНАЛҒАН МЕМЛЕКЕТТІК САЯСАТТЫҢ АСА МАҢЫЗДЫ САЛАСЫ

Мемлекет басшысы Қасым-Жомарт Кемелұлы Тоқаевтың 2025 жылғы 5 қарашадағы N1081 Жарлығымен бекітілген “Қазақстан Республикасы ішкі саясатының негізгі қағидаттары, құндылықтары мен бағыттары” - ел дамуының келешегіне қатысты мемлекет пен қоғамның ортақ көзқарасын қалыптастыратын маңызды құжат болып табылады.

Қүжатта ұсынылған басты қағидаттар, құндылықтар мен бағыттар мемлекеттік органдардың ішкі саясат саласындағы жұмысын ұйымдастыратын маңызды бағдарлар мен тәсілдерді анықтайды.

Ішкі саясаттың мақсаты - мемлекеттілігімізді және ел бірлігін нығайту, елді тұрақты дамыту үшін қоғамдық-саяси ахуалдың тұрақтылығын қамтамасыз ету.

Құжатта атап көрсетілгендей, басты идея - баршаға мүмкіндік беретін ашық, қуатты және дамыған ел, жауапты және өркениетті қоғам - Әділетті Қазақстанды құру.

Басты идеяны жүйелі жүзеге асыру үшін мемлекет құру ісінің “Заң мен тәртіп”, “Халық үніне құлақ асатын мемлекет”, “ Әртүрлі көзқарас - біртұтас ұлт”, “ Күшті Президент - Ықпалды Парламент - Есеп беретін Үкімет”, “Адал азамат”, “Таза Қазақстан” сияқты қалыптастырылған әмбебап қағидаттары ауқымды қоғамдық диалог жағдайында ұлтты одан әрі ұйыстыруға бағытталады.

Ішкі саясат саласындағы жұмыстың негізін Қазақстанның барша азаматына ортақ дәстүрлі және заманауи құндылықтар - тәуелсіздік пен отаншылдық, бірлік пен ынтымақ, әділдік пен жауапкершілік, заң мен тәртіп, еңбекқорлық пен кәсіби біліктілік, жасампаздық пен жаңашылдық сияқты жалпыұлттық құндылықтар жүйесі құрайды.

Әлемде кеңінен қолданылатын тәжірибе - елдің тарихи-мәдени ерекшеліктерін айқындайтын, елдің бірыңғай нышандар жүйесін және брендін қалыптастыратын ұлттық нышандар тізімі елдің өзіне тән ерекшелігін тануға, жалпыұлттық бірегейлігімізді нығайтуға және тарихи-мәдени мұрамызды сақтауға ықпал етеді.

Ішкі саясаттың басым бағыттарына жататын қоғамдық диалог, этносаралық қатынас саласындағы саясат, дін саласындағы саясат, мәдени-гуманитарлық саясат, отбасы саясаты, жастар саясаты, ақпарат саясаты бойынша айқындалған нақты тәсілдер салалардағы мемлекеттік саясаттың тиімділігін қамтамасыз етеді.

Қорытындыда ішкі саясаттың негізгі қағидаттары, құндылықтары мен бағыттары жалпыұлттық сипатқа ие және оларды барлық мемлекеттік органдар өз қызметінде ескеруге міндетті екендігі атап көрсетіледі.

Президент Жарлығымен бекітілген құжат ережелерін іске асыру ішкі саяси тұрақтылықты нығайтуға, қоғамның және мемлекеттің орнықты дамуын қамтамасыз етуге, әрбір азаматы біртұтас, жауапты және озық ойлы ұлттың өкілі саналатын Әділетті Қазақстанды құруға ықпал етеді.

Фото

Previous Next