ТҰРҒЫНДАР ШАҒЫМЫ: ҚАТЕРДІ ЕСКЕРМЕЙ БАСТАЛҒАН ҚҰРЫЛЫС

2025 жылдың қыркүйек айынан бастап Тараз қаласындағы Ш.Мұртаза көшесі №28 мекенжайында орналасқан бұрынғы «Даму» балалар орталығының екі қабатты ғимараты бұзылып, оның орнына жертөлесі бар төрт қабатты екі тұрғын үйдің құрылысы басталған. Аталған нысанның салынуы осы көшенің тұрғындары арасында наразылық туғызып, олар мәселе бойынша облыстық Қоғамдық кеңеске шағым түсірді.

 Тұрғындар жолдың біржақты болуына, дәл осы аралықта №2 мектеп-гимназияның орналасуына байланысты оқушылар қозғалысының қауіптілігіне назар аударған. Сонымен қатар, Т.Рысқұлов атындағы демалыс саябағына жақын аймақта көлік пен жаяу жүргіншілер қозғалысының қиындайтыны, жеке тұрғын үйлер тығыз орналасқан аумаққа көпқабатты үй салудың заңдылығы күмән тудыратындығы айтылған.

 Облыс орталығының сейсмикалық қауіпті аймаққа жататындығын ескерген халық жеке үйлердің ортасында нүктелік құрылыс салудың өмірге қауіп төндіретінін де атап өткен. Бұдан бөлек, қаланың бас жоспарына сәйкес келмейтін нысанның салынуы – бұрынғы монша мен қоғамдық демалыс орны орналасқан аумақты мақсатсыз пайдалану ретінде бағаланған.

 Осы мәселелерді алға тартқан тұрғындар жергілікті атқарушы органдардың мұндай құрылысқа рұқсат беруіне наразылық танытып, Қоғамдық кеңестен араласуын сұраған. Осыған байланысты облыстық қоғамдық кеңестің төрағасы Дүйсенәлі Бықыбаев бастаған комиссия құрылыс орнына барып, тұрғындармен тілдесіп арыз бойынша жұмыс жүргізді.

 Ал Тараз қаласы әкімдігінің Сәулет және қала құрылысы бөлімінің бас маманы Аслан Шілдетайдың айтуынша, құрылыс жұмыстары барлық талаптарға сай, тиісті оң сараптамадан өтіп, заң шеңберінде жүргізіліп жатыр.

 Бұл ретте облыстық Қоғамдық кеңес құжаттардың заңдылығын қайта тексеру қажеттігін атап өтіп, мәселені нақтылау үшін Мемлекеттік сәулет-құрылыс бақылау басқармасының басшысы – бас мемлекеттік құрылыс инспекторының атына ресми хат жолдады.

 Тұрғындар шағымы аяқсыз қалмайтыны, бұл істің одан әрі қаралатыны белгілі болды.

Фото

Previous Next