Қазкеңес жаңалықтары

Цифрландыру, бақылау және қоғамдық диалог: Аида Балаеваның Ақмола облысына жұмыс сапарының қорытындысы

Цифрландыру, бақылау және қоғамдық диалог: Аида Балаеваның Ақмола облысына жұмыс сапарының қорытындысы

ҚР Премьер-Министрінің орынбасары — Мәдениет және ақпарат министрі Аида Балаева Ақмола облысына жұмыс сапарымен барды. Сапардың маңызды оқиғасы — өңір активімен және Қоғамдық кеңес мүшелерімен өткен кеңейтілген кеңес болды. Жиынға облыс әкімі Марат Ахметжанов қатысты.

Кездесу күн тәртібінде әлеуметтік инфрақұрылымды дамыту мен инновациялық стартаптарды енгізуден бастап, қоғамдық кеңестер мен ТҮКШ (ТКШ) саласындағы заңнаманы реформалауға дейінгі ауқымды мәселелер қамтылды.

Цифрландыру — тәртіп кепілі

Талқылаудың басты тақырыптарының бірі цифрландыру болды. Аида Балаева атап өткендей, ақпараттық жүйелерді енгізу — бұл жай ғана уақыт талабы емес, сыбайлас жемқорлықпен және тиімсіздікпен күресудің пәрменді құралы.

«Цифрлық шешімдер жекеменшік білім беру секторындағы өрескел заңбузушылықтарды, соның ішінде «өлі жандар» мен жалған есептерді анықтауға мүмкіндік берді. Цифрландыру — тәртіп орнату мен процестерді оңтайландырудың қажетті тетігі», — деп атап өтті вице-премьер.

Осы орайда комиссия төрағасы Е.Б. Нұғыман облыс ардагерлеріне компьютерлік сауаттылықты үйрету бағдарламасын іске қосуды ұсынды. Бұл бастама қолдау тапты: жаппай цифрландыру жағдайында аға буын өкілдері мемлекеттік қызметтерден тыс қалмауы тиіс.

Заңнамалық бастамалар: ТҮКШ және Қоғамдық кеңес мәртебесі

Қоғамдық кеңес мүшелері бірқатар өзекті ұсыныстарды ортаға салды. Вячеслав Шуль энергетика секторының қауіпсіздігі мәселесін көтеріп, электр энергиясына «стратегиялық тауар» мәртебесін беруді және коммуналдық кәсіпорындарды жеке қолға берудің орындылығын қайта қарауды ұсынды.

Ұсыныстардың құқықтық блогын Әлияш Әхетова таныстырды. Оның ұсыныстары:

Қоғамдық кеңес (ҚК) мүшелерін сайлау рәсімін қайта қарау; Комиссиялар жұмысының тиімділігінің нақты индикаторларын енгізу; Әрбір ҚК мүшесінің екі айда бір рет есеп беру тәжірибесін енгізу.

Оның әріптесі Игорь Плюснин мемлекеттік органдардың кеңес ұсынымдарын қарау тетігін де қайта қарау қажеттігін қосты. Оның пікірінше, жария кеңістікте берілген ұсынымдардан бас тарту ұғымын алып тастап, процестің барынша ашықтығын қамтамасыз ету керек.

Мәдениет, ана мен бала және әлемдік рекордтар

Әлеуметтік тұтастық мәселелеріне де ерекше назар аударылды. Анаргүл Мұхамедрахимова көпбалалы аналардың түрлі қоғамдастықтарын біріктіру және жұмыстың қайталануын болдырмау бастамасын көтерді.

Облыс әкімі Марат Ахметжанов А. Мұхамедрахимованың жетекшілігімен Аналар кеңесінің атқарып жатқан жұмысын жоғары бағалады. Өңірдің жарқын жетістігі ретінде көпбалалы аналардың ұлттық киіммен өткен шеруі Гиннестің рекордтар кітабына енгенін еске салды. «Бұл — қоғамдық бастаманың дәстүрлеріміз бен бірлігімізді қалай нығайтатынының айқын үлгісі», — деді аймақ басшысы.

Бірлескен жұмысқа көшу

Талқылауды қорытындылай келе, Аида Балаева барлық айтылған ұсыныстар зерделеніп, тиісті орталық мемлекеттік органдарға жіберілетінін айтты. Ол Ақмола облысы Қоғамдық кеңесінің қазіргі құрамын «Қоғамдық кеңестер туралы» заңның тиімді жұмысының жақсы үлгісі деп атады.

«Мемлекет басшысының тапсырмаларын іске асыру үшін бізге бірлескен жұмыс форматына көшу қажет. Азаматтық қоғам мен атқарушы билік арасындағы тұрақты байланыс — елді дамытудың бірден-бір жолы», — деп түйіндеді вице-премьер.