ДӘРІЛЕР БАҒАСЫНА ҚОҒАМДЫҚ БАҚЫЛАУ

ҚР Мәдениет және ақпарат министрлігінің “Дәрілер бағасына қоғамдық бақылау жүргізу туралы” 2026 жылғы 6 қаңтардағы хатына сәйкес барлық деңгейдегі Қоғамдық кеңестер 8 қаңтар - 1 ақпан аралығында дәріханаларда дәрілік заттардың бағаларының сақталуына қоғамдық бақылау жүргізуде.

Елімізде дәрілік заттарға баға белгілеу тетігін жетілдіру аясында Денсаулық сақтау министрлігі тарапынан жүйелі шаралар қабылданып, дәрілік заттардың халық үшін экономикалық қолжетімділігін арттыруға бағытталған жұмыстар жүргізілуде.

Атап айтқанда, дәрі-дәрмектердің 2900 сауда атауына бағалар қайта қаралып, жаңа шекті бағалар бекітілді.

Сонымен қатар азаматтар үшін қоғамдық бақылау барысында заң бұзушылық байқалған жағдайда тиісті уәкілетті органдарға dari.kz мобильді қосымшасы арқылы шағымдану мүмкіндігі қарастырылған.

Осы мақсатта Жамбыл облыстық Қоғамдық кеңесінің мүшелері дәрілер бағасына қоғамдық бақылау жүргізу кестесіне сәйкес Тараз қаласы, Байзақ, Жуалы, Жамбыл, Қордай, Сарысу, Талас, Т. Рысқұлов, Меркі аудандарында орналасқан дәріханаларда жаңа шекті бағалар бекітілген 2900 дәрілердің сауда бағасына қоғамдық бақылау жүргізді.

ҚР Денсаулық сақтау министрлігі медициналық және фармацевтикалық бақылау комитетінің Жамбыл облысы бойынша департаментінің мәліметінше, облыста барлығы 440 дәріханалар тіркелген. Оның ішінде 227 дәріхана Тараз қаласында, ал 168 дәріхана қоғамдық бақылау жүргізілген 8 аудандарда орналасқан.

Қоғамдық бақылау барысында сатып алу тәсілімен алынған кейбір дәрілердің сауда бағасы бекітілген жаңа шекті бағаларға сәйкес келмейтіні және халық үшін қолжетімсіз екендігі анықталды.

Осыған байланысты алдағы уақытта дәрілер бағасына қоғамдық бақылау кестеге сәйкес жалғасып, бақылау барысында анықталған мәселелер мен ұсыныстар тиісті мемлекеттік органдарға жолданады.

Фото

Previous Next