БОЛАШАҚҚА БАҒДАРЛАНҒАН ПРОГРЕССИВТІ ҚҰЖАТ

Жамбыл облыстық Қоғамдық кеңесі ҚР жаңа Конституциясы жобасының негізгі тұжырымдарын талқылау және қолдау мақсатында  жиын өткізді.

Кеңес мүшелері Конституцияның жаңа мәтінінде адам құқықтары мен бостандықтарын сақтау қағидатына басымдық беріліп, Президент Қасым-Жомарт Кемелұлы Тоқаевтың «Заң мен тәртіп» жаппай үстемдік құрған «Әділетті әрі таза Қазақстанды құру» идеясы, жауапты әрі жасампаз отаншылдық идеясы басты орынға қойылғанын атап өтті.

Жаңа Конституция жобасына енген нормалар Қазақстанның саяси жүйесінің даму қисыны мен бірізділігін бекітетіні және «Күшті Президент – ықпалды Парламент – есеп беретін Үкімет» тұжырымдамасына негізделетіні туралы пікірлер айтылып, Заң мен тәртіп үстемдік етпейінше, қоғам дамымайтыны, сана өзгермейтіні және бұл әділетті қоғамның басты шарты екендігі қызу талқыланды.

Соңғы жылдардағы саяси жаңғыртулар, соның ішінде 2022 жылғы конституциялық реформа мемлекетіміздің конституциялық негізін толық қайта құру қажет екенін көрсететіні, шын мәнінде, бұл – мемлекетті басқарудың жаңа жүйесін қалыптастыруды білдіретініне тоқталған кеңес мүшелері ұсынылған түзетулер билік құзыреттерін қайта бөлуге, тежемелік және тепе-теңдік жүйесіндегі теңгерімді күшейтуге, ең бастысы, барлық саяси институттардың тиімділігі мен орнықтылығын жақсартуға мүмкіндік беретінін айтты.

Жиында жаңа Конституция жобасында «адам мемлекет үшін емес, мемлекет адам үшін» қағидаты айқындала түскені, еліміздің мақсат-міндеттерін, құндылықтары мен қағидаттарын заман талабына сай, конституциялық деңгейде жаңғыртудың айрықша маңыздылығы атап айтылды.

Бұл өзгерістердің басты мақсаты – жаңа тарихи дәуірде мемлекеттің негіздерін түбегейлі қайта құру, қоғамдық сананы жаңғырту. Жиынға қатысушылар аса қажетті әрі озық нормалар енгізілген Ата Заңымызға қатысты түпкілікті шешім жалпыұлттық референдумда қабылданатыны, басты мақсат еліміздің әлеуметтік-экономикалық және халықаралық әлеуетін арттыруда екендігі және Жаңа Конституция Қазақстанды тың қарқынмен өркендетуге, әр азаматтың әлеуетін арттыруға жол ашатынына сенім білдіре отырып, болашаққа бағдарланған прогрессивті құжатты қолдайтындарын жеткізді.  

Фото

Previous Next