Қоғамдық кеңес отырысы өткізілді.

20 ақпан 2026 жылы Зайсан аудандық қоғамдық кеңесінің жоспарлы отырысы өткізілді. Кеңес отырысына 15 қоғамдық кеңес мүшелерінің 12 мүшелері қатысты. Күн тәртібіндегі бірінші мәселе бойынша «Аудандағы мал дәрігерлік қызмет бойынша атқарылып жатқан жұмыстар туралы» «Зайсан вет» коммуналдық мемлекеттік кәсіпорнының басшысы Қ. Чилибаев хабарлама жасады. Хабарламада аудандағы мал дәрігерлік қызмет бойынша атқарылып жатқан жұмыстар туралы қысқаша баяндалды.
Адам дәрігері адамды емдейді, ал мал дәрігері бүкіл адамзатты емдейді деп тегін айтылмаған. Әсіресе, экономикасының негізі де, тіршілік көзі де мал шаруашылығы болып отырған, шекаралық аймақта орналасқан біздің аудан үшін мал дәрігерлік жұмыстың маңызы ерекше. Аудан әкімдігінің басшылығымен бұл бағытта біршама жұмыстар атқарылып жатқанын, дегенмен орын алып отырған кемшіліктер де бар екенін қоғамдық кеңес мүшелері атап өтті. Әсіресе, елді мекендердегі қаңғыбас иттердің мәселесі шешілмей келе жатқаны, тіпті Зайсан қаласының ішінде де қаңғыбас иттердің тұрғындарға әсіpece балаларға қауіп төндіріп отырғаны алаңдатарлық жағдай екендігі атап өтілді. Бұл мәселе қала және ауыл әкімдері тарапынан тез арада шешуді қажет етеді. Шілікті ауылдық округінен малдың құтырық ауруының шығу фактісі ветеринарлық қызмет саласында алдын алу жұмыстарының жеткіліксіздігі болып табылады. Ауданда сарып ауыруының тиылмай келе жатқаны кейінгі кездері сарып ауруын алдын алу жұмыстарының аяқсып кеткенін, мал дәрігерлерінің тарапынан бұл жұмыстағы бейқамдығын көрсетеді. 2016 жылдары ауданда бес мыңға жуық мал сарып ауруына шалдығып, ауыл тұрғындары тарапынан орынды наразылықтар болып, тіпті саяси мәселе болғанын ұмытпауымыз керек. Сол кезде Шілікті өңірінен шыққан сарып ауыруын дер кезінде оқшауламау себебінен, Кеңсай округіне жалғасып, одан бүкіл ауданға тарағаны белгілі. Өткен жылы сарып ауруы Қаратал ауылдық округінің Жіңішке су учаскесінен анықталса, биылғы жылы оған іргелес жатқан Дайыр, Біржан ауылдарынан шығып жатқаны алаңдатарлық жағдай. Әрине 2016 жылдан бері сарып ауруын азайту жөнінде Қ. Чилибаев басқарып отырған «Зайсан вет» мекемесі үлкен жұмыстар атқарды. Қала және ауылдық округ әкімдері де тұрғындармен бірлесе отырып сарып ауруына қарсы вакцина егу жұмыстары да кеңінен қолға алынған болатын. Соның нәтижесінде сарып ауруы он еседен артық азайды. Алайда сарып ауруының ошақтарының жойылмай келе жатқаны бұл жұмыстардың кейінгі жылдары босаңсып кеткенін, аудандық ветеринарлық қадағалау мекемесі (бастығы С.Сахариев) тарапынан бақылаудың жеткіліксіздігі, сондай-ақ тұрғындар тарапынан вакцинациялау жұмыстарының бәсеңсіп кеткені, жұмыс босаңсыған жерде жұқпалы аурулар тез тарап кететінін, бұл аудан экономикасына орасан зиян келтіріп, аудандағы адамдар өміріне кауіп төндіретіні аудандық қоғамдық кеңес төрағасы М.Уәли тарапынан қатты да, орынды айтылды. Тек 2025 жылы ғана ауданда 6 адам сарып ауруымен, оның ішінде 1 бала ауырған. Бұл жұмысқа жалғыз «Зайсан вет» кәсіпорны ғана емес аудандық ауылшаруашылық және кәсіпкерлік бөлімі (Қ. Каримов), кала және ауыл әкімдері де жауапкершілікпен кірісіп, сарып ауруының алдын алу жұмыстары бойынша вакцинациялау, дезинфекциялау, тазалық, мал қозғалыстарын қатаң бақылау сияқты жұмыстарды дер кезінде жүргізіп отыруы тиіс деген қоғамдық кеңес тарапынан аудан әкімдігіне ұсыныс жасалды. Сарып ауруының адамдарға жұғу фактілері зерделеніп, кінәлі адамдардың жауапкершілігі қаралып отыруы керек.
Ветеринария мекемелерінің барлығына қажетті жағдай жасалған, арнайы автокөліктер, ғимараттармен, қажетті құрал жабдықтармен қамтамасыз етілген. Биылғы жылы ауданда
төрт жаңадан ветпунктер қажетті құрал жабдықтарымен салынатын болады. Тек осы арнайы автокөліктер өз мақсатында, дұрыс пайдаланып, ауыл тұрғындары арасында мал дәрігерлік түсінік жұмыстары тоқтаусыз жүргізілуі тиіс. Сондай-ақ қоғамдық кеңес отырысында бұл жұмысқа ауылдардағы қоғамдық кеңес мүшелері де атсалысуы керектігі міндеттеліп, тапсырылды.
Күн тәртібіндегі екінші «Мүмкіндігі шектеулі жандарға жасалып жатқан әлеуметтік көмектер мен қолдаулар туралы» мәселе бойынша аудандық жұмыспен қамту және әлеуметтік бағдарламалар бөлімінің басшысы Ж.Қинашева хабарлады. Қоғамдық кеңес мүшелері осы бағытта ауданда атқарылып жатқан жұмыстарға оң баға беріп, сонымен бірге алдағы уақытта «Кедергісіз келешек» бағдарламасын орындау бойынша жұмыстарды жақсартуды ұсынды.
Күн тәртібіндегі үшінші мәселе Зайсан ауданы бойынша конкурсқа ұынылатын ауылшаруашылығы жер учаскелерінің тізімін қарап, коғамдық кеңес мүшелері тізімде ұсынылып отырған он бес жер учаскелерін конкурска ұсынуға келісімдерін берді.
Күн тәртібіндегі соңғы “Аудандағы шекара белдеуіндегі ауылшаруашылық жерлерді пайдалану туралы” мәселе аудан көлемінде шешілмейтін болғандықтан алдағы уақытта бұл мәселені жоғарғы билік органдарымен және парламент депутаттары арқылы шешу керектігі жөнінде ұсынылды.

Зайсан аудандық қоғамдық кеңесінің ақпараттық орталығы.

Фото

Previous Next