Тұрақты комиссияның көшпелі отырысы

27 ақпанда «Анаға тағзым» орталығында қалалық мәслихаттың әлеуметтік-мәдени даму және жастар ісі бойынша тұрақты комиссиясының көшпелі отырысы өтті.

Депутаттар мен Қоғамдық кеңес мүшелерімен балалардың құқықтарын қорғау, бұқаралық спортты дамыту, «Дара бала» платформасының жұмысы, басқа да мәселелер талқыланды.

Бүгінгі күні қалалық білім бөлімінің қорғаншылық және қамқоршылық органының есебінде 424 бала тіркеуде тұр. Оның ішінде 27-сі патронаттық тәрбиеде. 410 балаға «Отбасы банк» есепшот ашылып, демеушілікпен, қорғаншылармен қаражат толықтырылуда.

Одан бөлек қала бойынша 109 қолайсыз отбасы тіркелген. Барлық бала саны 241 (116 қыз, 125 ұл). Бұл отбасылармен адрестік жұмыстар жүргізіледі: FSM Social жүйесіне тіркеліп, Отбасын қолдау орталығымен бірлесіп көмек көрсетіледі (мектеп құралдары, азық-түлікпен қамтамасыз ету, заңгер, психологиялық көмек, т.б.).

Сондай-ақ қала және аудан әкімдіктері жанында кәмелетке толмағандардың істері және олардың құқықтарын қорғау жөніндегі комиссия жұмыс істейді. 2025 жылы комиссия отырыстарында 170 материал қаралып, ата-аналарға, балаларға ескерту беру, полиция есебіне алу, ата-ана құқығын шектеу, арнайы мектеп-интернатқа жолдау, т.б. шешімдер қабылданған.

Өткен жылы Республика бойынша алғаш рет біздің өңірде Балалардың құқықтарын қорғау басқармасы құрылды. Басқарма кәмелетке толмағандардың істері және олардың құқықтарын қорғау жөніндегі комиссияларының қызметін үйлестіру және мониторинг жүргізу қызметін атқарады.

Комиссия отырысында бала құқықтарын қорғау мәселелері бойынша қала әкімінің орынбасары Әсет Оралбаев, Балалардың құқықтарын қорғау басқармасы басшысы Әліби Латып, білім бөлімінің басшысы Меткүл Қосымбаева баяндады.

Фото

Previous Next