Қазкеңес жаңалықтары

Облыстық қоғамдық кеңестің отырысында мүгедектікті айқындау және донорлық мәселелерін қарау туралы

2026 жылғы 27 наурызда С. Торайғыров атындағы облыстық әмбебап ғылыми кітапханасының конференц-залында Демеуов Бәкірдің төрағалығымен облыстық қоғамдық кеңестің отырысы өтті. Отырыста келесі мәселелер қаралды: 1. Өңір халқы арасында мүгедектікті айқындау жұмысы және медициналық-әлеуметтік сараптаманың қолжетімділігін қамтамасыз ету. 2. Донорлық мәселелері. Отырыс жұмысына облыстық мәслихат төрағасы Илья Теренченко, денсаулық сақтау басқармасы басшысының орынбасары Айгүл Мұқышева, Павлодар облысы бойынша халықты әлеуметтік қорғау саласындағы реттеу және бақылау департаменті бастығының орынбасары Алтын Смағұлова, ҚР Еңбек және халықты әлеуметтік қорғау министрлігі Мемлекеттік еңбек инспекциясы комитетінің Павлодар облысы бойынша департаментінің еңбек қауіпсіздігі және еңбекті қорғауды бақылау бөлімінің басшысы Ербол Сайфуров, облыстық жұмыспен қамтуды үйлестіру және әлеуметтік бағдарламалар баскарма басшысының орынбасары Әлия Рахимова, облыстық әкімшілік полициясы бастығының міндетін атқарушы, полиция майоры Айдын Нұрымов қатысты. Талқылау барысында қоғамдық кеңес мүшелері белсенділік танытып, баяндамашыларға сұрақтар қойып, ұсыныстар енгізді. Уәкілетті органдардың мәліметі бойынша, бүгінгі күні Павлодар облысында 30 037 мүгедектігі бар адам тіркелген. 2025 жылы 2 534 азаматқа алғаш рет мүгедектік тобы белгіленсе, 2024 жылы – 2 342 азаматқа белгіленген. Азаматтарды медициналық-әлеуметтік сараптамаға жолдау алғашқы медициналық-санитариялық көмек ұйымдарының дәрігерлік-консультациялық комиссиялары арқылы жүзеге асырылады. 2025 жылы медициналық-әлеуметтік сараптама қорытындыларына (алғашқы куәландыру және қайта куәландыру) шағымдану бойынша 226 адам жүгінген, оның ішінде 147 адам – сырттай проактивті куәландыру тәртібімен (негізінен онкологиялық аурулары бар пациенттер). Бұрын сақтандырылу мәртебесі болмаған пациенттерді тексеру және медициналық-әлеуметтік сараптамаға жолдау мәселелері қазіргі уақытта шешімін тапқаны атап өтілді. Отырыс қорытындысы бойынша облыстың бейінді департаменттері мен басқармаларына қолданыстағы нормативтік құқықтық актілерге өзгерістер енгізу, оның ішінде аяқ-қол ампутациясына байланысты жағдайларда сараптама жүргізу тәртібін жетілдіру жөнінде ұсынымдар берілді. Қорытынды: Өңірде мүгедектікті айқындау және медициналық-әлеуметтік сараптаманың қолжетімділігін қамтамасыз ету жұмыстары жүйелі түрде жүргізілуде. Сонымен қатар, нормативтік-құқықтық реттеуді және жекелеген рәсімдерді одан әрі жетілдіру қажеттілігі бар.

Фото