Қазкеңес жаңалықтары

ЖАМБЫЛ ОБЛЫСТЫҚ ҚОҒАМДЫҚ КЕҢЕСІНДЕ ҚОҒАМДЫҚ БАҚЫЛАУ ЖҮЗЕГЕ АСЫРЫЛДЫ

Жамбыл облыстық Қоғамдық кенесінің жұмыс жоспарына сәйкес Жамбыл, Жуалы аудандарының денсаулық сақтау мекемелері, техникалық және кәсіптік білім ұйымдары, аудан әкімдіктерінің сәулет және құрылыс, автомобиль жолдары және жолаушылар көлігі, ішкі саясат бөлімінің дін істері саласына қоғамдық мониторинг жүргізілуде.

Комиссия төрағалары Р.Рахманбердиев, С. Құрманбекова, А.Төлебаев, Ә.Зәуірбеков кеңес мүшелері және комитет құрамымен бірлесе мемлекеттік органдардың шешімдер қабылдау процесіне азаматтық қоғамның қатысу мүмкіндігін кеңейту мақсатында қоғамдық бақылауды жүзеге асыру тетіктері арқылы тиісті жұмыстарды ұйымдастырды.

Азаматтарды қоғамдық қабылдау барысында Жамбыл ауданының тұрғындары коммуналдық қызметтер, автомобиль жолдары, аудандық аурухананы жөндеу жұмыстары туралы сұрақтарды көтерді.

“Өрнек” ауылында орналасқан №17 Жамбыл колледжін 2023-2025 жылдары аяқтаған түлектердің жұмысқа орналасу көрсеткіштерін зерделеу мемлекеттік тапсырыс негізінде 3 мамандық бойынша даярланған мамандардың жұмысқа орналасуы 30% ғана құрайтынын көрсетті.

Ауыл шаруашылығын механикаландыру, дәнекерлеу ісі, автокөлік слесарі бағдарламалары бойынша жұмысшы мамандарды даярлайтын оқу орнында биыл 119 бала білім алуда. Жобалық қуаттылығы 240 орындық колледжде 18 оқытушы, шеберлер қызмет атқарады.

Жамбыл аудандық орталық ауруханасының басшылығы Қоғамдық кеңестен мекемеде туындаған бірқатар қаржылық қиындықтарды шешуге, оның ішінде стационарлық ғимаратына күрделі жөндеу жүргізудің ЖСҚ мемлекеттік сараптамадан өткізілуіне байланысты облыстық бюджеттен қажетті қаражат бөлуге қолдау көрсетіп, ықпал етуді сұрады.

Жамбыл ауданы бойынша жүзеге асырылған қоғамдық бақылау қорытындысы аудан әкімі Ерлан Қыдыралының қатысуымен талқыланып, алдағы уақытта қолданыстағы заңнама аясында тиісті мемлекеттік органдармен бірлесе жан-жақты қарастырылатыны айтылды.

Жамбыл ауданы бойынша облыстық Қоғамдық кеңестің қоғамдық бақылау нысандарын жүзеге асыруына қажетті ұйымдастыру шараларына ақпараттық қолдау көрсеткен аудандық Қоғамдық кеңестің төрағасы Рүстем Әлішұлы Бегалиевке, кеңес хатшысы Бұлбұл Қайратқызына алғыс айтамыз!

Фото