Қазкеңес жаңалықтары

ҚОҒАМДЫҚ БАҚЫЛАУДЫҢ МІНДЕТІ - ЖЕРГІЛІКТІ АТҚАРУШЫ ОРГАНДАРДЫҢ ҚЫЗМЕТІНЕ АЗАМАТТАРДЫҢ СЕНІМ ДЕҢГЕЙІН АРТТЫРУ

Жамбыл облыстық Қоғамдық кеңесінің мониторингтік тобының мүшелері Д. Бықыбаев, Б.Құлекеев, Р.Рахманбердиев, С. Құрманбекова, А.Төлебаев, Ж.Орынбаева, Б. Бекмухамбетова жұмыс жоспарына сәйкес Байзақ ауданы әкімдігінің бөлімдерінің қызметіне қоғамдық бақылау жүргізді.

“AMANAT” партиясы Байзақ аудандық филиалының ғимаратында топ мүшелері азаматтық қоғам өкілдері, ардагерлер ұйымы, мемлекеттік органдар қызметкерлері, ауыл тұрғындарымен кездесіп, қоғамдық бақылаудың мақсат-міндеттерін түсіндірді.

Қоғамдық кеңес төрағасы Д. Бықыбаев ауданның денсаулық сақтау, дін істері, сәулет және құрылыс, автомобиль жолдары және жолаушылар көлігі салаларының қызметтеріне мониторинг жүргізілетіні және аталған салалар бойынша азаматтардың сұрақтары қарастырылатынын атап өтті.

Азаматтарды қабылдау барысында Байзақ аудандық орталық ауруханасынан тегін дәрілер қаңтар айынан бері берілмей жатқаны, жастар ресурстық орталығының жеке ғимараты болмауы, орталық мамандарының айлық жалақысының төмен болуы(130-150 мың теңге), қосымша үстемақы төлеуде аудан бюджеті қаражатының жеткіліксіздігі туралы сұрақтар көтерілді.

Кеңестің білім, денсаулық сақтау, мәдениет, спорт, жастар саясаты және қоғамдық даму жөніндегі комиссия төрағасы С. Құрманбекова қабылдау барысында қойылған сұрақтар Қоғамдық кеңес тарапынан бақылауда болатынын және оң шешімін табуға ықпал ететінін айтты.

Жиынға шақырылған Байзақ аудандық орталық ауруханасының қызметкерлері тегін дәрі-дәрмектер алынғанын, алдағы уақытта азаматтарға толық берілетінін жеткізді.

Мониторингтік топ мүшелері Байзақ аудандық Қоғамдық кеңесінің төрағасы Қ. Ораловпен бірге жастар ресурстық орталығы 2 ай бұрын уақытша орналасқан ғимаратқа барып, 11 қызметкер жұмыс атқаратын орталықтың базасы және жұмысымен танысты.

Еліміздің болашағы - жастарға арналған мемлекеттік жастар саясатын жүзеге асыру мақсатында жастарға жан-жақты қолдау көрсету, жастар ұйымдарын дамыту -баршамызға ортақ міндет.

Облыстық және аудандық Қоғамдық кеңес мүшелері аудан жастарын қолдау және дамыту үшін қызметтер көрсету мақсатында құрылған жастар ресурстық орталығының қоғамдық маңызды мәселелерін шешу жолдарын қолданыстағы заңнама аясында қарастыру туралы шешім қабылдады.

Фото