Қазкеңес жаңалықтары

Маңғыстау облысы Қоғамдық кеңесінде мемлекеттік қызмет көрсету және туризмді дамыту мәселелері қаралды

Ағымдағы жылдың 9 сәуір күні Маңғыстау облысы Қоғамдық кеңесінің төрағасы Жүсіпов Бекмұрат Қыдырбайұлының төрағалығымен мемлекеттік қызмет көрсету сапасын арттыру және туризм саласын дамыту мәселелері бойынша кеңес отырысы өтті.

Жиын барысында өңірдегі атқарылған жұмыстардың қорытындылары шығарылып, алдағы кезеңге арналған міндеттер айқындалды.

2025 жылдың қорытындысы бойынша облыста 10,4 миллионнан астам мемлекеттік қызмет көрсетіліп, өткен жылмен салыстырғанда өсім байқалды. Қызметтердің 98 пайыздан астамы электрондық форматта ұсынылған. Бұл халыққа қызмет көрсету сапасы мен қолжетімділігінің артқанын көрсетеді.

Сонымен қатар, мемлекеттік қызмет көрсету барысында бірқатар заңбұзушылықтар анықталды. Атап айтқанда, қызмет көрсету мерзімдерін бұзу, артық құжат талап ету және белгіленген тәртіпті сақтамау фактілері тіркелген. Аталған кемшіліктер бойынша жауапты тұлғаларға тиісті шаралар қабылданып, бақылау күшейтілді.

Кеңес отырысында туризм саласының дамуына да ерекше назар аударылды. Ресми деректерге сәйкес, 2025 жылдың 9 айында өңірге 350 мыңнан астам турист келіп, көрсетілген қызметтер көлемі 17 млрд теңгені құрады. Бұл өткен жылмен салыстырғанда 13 пайызға жоғары.

Өңірде туристік инфрақұрылымды дамыту бағытында жүйелі жұмыстар жүргізілуде. Атап айтқанда, Каспий теңізі жағалауында жағажайларды абаттандыру, санитарлық-гигиеналық нысандар орнату, қауіпсіздікті қамтамасыз ету және демалыс аймақтарын жаңғырту жобалары іске асырылуда.

Сондай-ақ, Ақтау қаласында жағалауды қайта жаңарту және эко-парк форматындағы жағажай құру жобалары жоспарланған. Бұл бастамалар өңірдің туристік тартымдылығын арттыруға және экономиканың дамуына оң ықпал етеді.

Кеңес қорытындысы бойынша мемлекеттік қызмет көрсету сапасын арттыру, цифрландыруды дамыту және туризм инфрақұрылымын жетілдіру бағытында нақты тапсырмалар берілді.

Маңғыстау облысында аталған бағыттардағы жұмыстар алдағы уақытта да жүйелі түрде жалғасатын болады.

Фото