ЖАМБЫЛ ОБЛЫСТЫҚ ҚОҒАМДЫҚ КЕҢЕСІНІҢ МОНИТОРИНГТІК ТОП МҮШЕЛЕРІ САРЫСУ АУДАНЫНДА ҚОҒАМДЫҚ БАҚЫЛАУ ЖҮРГІЗДІ

Жамбыл облыстық Қоғамдық кеңесінің мониторингтік тобы Сарысу ауданы әкімдігінің мәжіліс залында аудан тұрғындары, азаматтық қоғам өкілдері, мемлекеттік қызметшілердің қатысуымен кездесу өткізіп, қоғамдық қабылдау жүргізді.

Ауыл азаматтары өңіріміздің батысында орналасқан аудан халқы негізінен мал шаруашылығы, егін шаруашылығымен айналысатынын айтып, Талас, Аса өзендерінен 10 жылдан аса уақыт бойы қажетті су берілмей, қиындықтар туындағанын көтерді. Сонымен қатар ауданда ірі сауда, ойын-сауық кешені салынып, жергілікті халықтың, жастардың, балалардың игілігіне берілсе деген ұсыныс берілді.

Кездесуге қатысқан аудан әкімінің орынбасары Жұмат Сақыпбеков ауданның әлеуметтік-экономикалық дамуы тұрақты екендігіне және өнеркәсіп, ауыл шаруашылығы, инвестиция және инфрақұрылым арқылы өлшенетініне және көтерілген сұрақтардың маңыздылығына тоқталып, алдағы уақытта басты назарда болатынын жеткізді.

Сарысу аудандық орталық ауруханасының басшылығы ғимаратқа жөндеу жұмыстарын жүргізуге ықпал етуді, ал Жаңатас көпсалалы колледжі, №11 Сарысу колледжі түлектерінің жұмысқа орналасу көрсеткіштерін зерделеу барысында колледж басшылығы оқу орындарына күрделі жөндеу жүргізуге және материалдық-техникалық базасын жаңғыртуға көмек көрсетуді сұрады.

Аудан әкімдігінің сәулет және қала құрылысы бөлімі, жолаушылар көлігі және автомобиль жолдары бөліміне жүргізілген қоғамдық бақылау барысында аталған бөлімдерде көрсетілетін мемлекеттік қызметтер сапасы, бағдарламаларды іске асыру нәтижелері зерделенді.

Қоғамдық бақылау жүзеге асырылған жергілікті атқарушы органдарға бақылау қорытындысы негізінде кеңес отырысында ұсынымдар қабылданып, тиісті мемлекеттік органдарға жолданатыны жеткізілді.

Мониторингтік топтың жұмыстарын тиімді жүргізуге ақпараттық-әдістемелік қолдау көрсеткен Сарысу ауданы әкімдігіне, Сарысу аудандық Қоғамдық кеңесінің төрағасы Сахарап Қырғызбаевқа, кеңес хатшысы Қанағат Дүйсебаеваға алғыс айтамыз.

Фото

Previous Next