Ағымдағы жылдың 15 сәуір күні Маңғыстау облысы Қоғамдық кеңесінің кеңейтілген кезекті отырысы Кеңес төрағасы Жүсіпов Бекмұрат Қыдырбайұлының төрағалығымен өткізілді.

Кеңес отырысында облыс әкімі Қилыбай Нұрдәулет Игілікұлы өңірдің 2025 жылғы әлеуметтік-экономикалық дамуының қорытындылары бойынша есеп беріп, атқарылған жұмыстар мен алдағы міндеттерді жан-жақты баяндады.

Есепті кезеңде өңірдің әлеуметтік-экономикалық дамуында оң динамика қалыптасып, негізгі көрсеткіштер бойынша тұрақты өсім қамтамасыз етілді. Өнеркәсіп өндірісінің көлемі артып, ауыл шаруашылығы, шағын және орта бизнес салаларында ілгерілеушілік байқалды. Инвестиция тарту жұмыстары жүйелі түрде жүргізіліп, жаңа өндіріс орындарын ашу және қолданыстағы кәсіпорындарды жаңғырту бағытында нақты жобалар іске асырылды.

Инфрақұрылымды дамытуға ерекше көңіл бөлініп, тұрғын үй құрылысы қарқын алды. Халықты сапалы ауыз сумен, электр және жылу энергиясымен қамтамасыз ету, автомобиль жолдарын жөндеу және жаңғырту бойынша кешенді жұмыстар атқарылды. Көлік-логистика саласын дамыту арқылы өңірдің транзиттік әлеуетін арттыруға бағытталған жобалар жүзеге асырылуда.

Әлеуметтік салада да бірқатар маңызды нәтижелерге қол жеткізілді. Білім беру жүйесінде жаңа мектептер салынып, қолданыстағы білім беру ұйымдары жаңартылуда. Денсаулық сақтау саласында медициналық қызметтердің сапасы мен қолжетімділігін арттыруға бағытталған шаралар қабылданып, жаңа нысандар пайдалануға берілді. Халықты жұмыспен қамту, әлеуметтік қолдау көрсету, жастар саясатын іске асыру бағытында жүйелі жұмыстар жалғасуда.

Кеңес отырысы барысында қоғамдық кеңес мүшелері өңірдің өзекті мәселелеріне қатысты ұсыныстарын білдіріп, ашық әрі сындарлы пікір алмасу өтті. Көтерілген мәселелердің қатарында инфрақұрылымды одан әрі дамыту, әлеуметтік қызметтердің сапасын арттыру, экология және тұрғындардың өмір сүру сапасын жақсарту мәселелері қамтылды.

Облыс әкімі барлық ұсыныстар мен ескертулер назарға алынатынын атап өтіп, оларды іске асыру бойынша нақты шаралар қабылданатынын жеткізді. Әрбір көтерілген мәселе бойынша тиісті мемлекеттік органдарға нақты тапсырмалар беріліп, олардың орындалуы тұрақты бақылауда болады.

Сонымен қатар облыстық мәслихат төрағасы мен Қоғамдық кеңес төрағасының қосымша баяндамалары тыңдалды.

Жалпы, Қоғамдық кеңес отырысы конструктивті диалог алаңына айналып, билік пен қоғам арасындағы тиімді өзара іс-қимылды нығайтуға ықпал етті. Алдағы уақытта да облыс әкімдігі қоғамдық кеңеспен бірлесіп, өңірдің орнықты әлеуметтік-экономикалық дамуын қамтамасыз ету бағытындағы жұмысты жалғастырады.

Фото

Previous Next