2026 жылдың 22 сәуір күні Маңғыстау облысының Қоғамдық кеңесінің отырысы өтті

Кеңес төрағасы Жүсіпов Бекмұрат Қыдырбайұлының төрағалығымен өткен жиында облыстық бюджетті нақтылау және өңірдегі бірқатар маңызды жобалар қаралды.

Кеңес отырысында 2026 жылға арналған жергілікті бюджетті нақтылау туралы шешім жобасы ұсынылды.

Нақтылау шеңберінде тұрғын үй-коммуналдық инфрақұрылымды дамытуға ерекше назар аударылып отыр. Мемлекеттік бағалы қағаздар шығару есебінен 29,2 млрд теңге қаражат тарту жоспарланған. Оның 13,5 млрд теңгесі тұрғын үй кезегінде тұрған азаматтарға 770 жалға берілетін пәтер сатып алуға бағытталса, 15,7 млрд теңге инженерлік-коммуникациялық инфрақұрылымды дамытуға жұмсалады.

Атап айтқанда, Ақтау қаласы мен аудандарда электр, газ, су желілерін жүргізу, жаңа шағын аудандарды инфрақұрылыммен қамтамасыз ету және қолданыстағы жүйелерді жаңғырту бойынша бірқатар жобалар іске асырылмақ.

Кеңесте мемлекеттік-жекешелік әріптестік аясында жүзеге асырылып жатқан «Сергек» бейнебақылау жүйесінің жұмысы да қаралды. Бүгінде өңірде 148 аппараттық-бағдарламалық кешен және 402 бейнебақылау камерасы орнатылып, қоғамдық қауіпсіздікті қамтамасыз етуге тиімді үлес қосуда.

Жоба іске қосылғалы бері 757 мыңнан астам жол қозғалысы ережесін бұзу дерегі тіркеліп, 6 млрд теңгеден астам айыппұл салынған. Оның ішінде 5,2 млрд теңге бюджетке өндірілген.

Қазіргі уақытта жобаны кеңейту және 2031 жылға дейін ұзарту мәселесі қарастырылуда. Жоспарға сәйкес қосымша 156 кешен орнату, қолданыстағы жүйелерді жаңғырту және интеллектуалды көлік жүйесін енгізу көзделген.

Отырыстың қорытындысы бойынша ұсынылған мәселелер жан-жақты талқыланып, тиісті ұсыныстар берілді.

Фото

Previous Next