Қоғамдық кеңестің кезектен тыс отырысы өтті.

Зайсан аудандық қоғамдық кеңеске аудандағы мемлекеттік мекемелерден нормативті - құқықтық актілердің түсуіне және осы актілердің қарау мерзімін сақтауға байланысты 18 мамыр 2026 жылы кеңестің кезектен тыс отырысы өтті. Аудандық қоғамдық кеңестің 15 мүшелерінен 13 мүшелері қатысты. Күн тәртібінде төрт мәселе қаралды:
Бірінші мәселе “Зайсан аудандық мәслихатының
2025 жылғы 19 желтоқсандағы
«2026-2028  жылдарға арналған
Зайсан ауданының бюджеті туралы
№45/2-VIII шешіміне өзгерістер
мен толықтыру енгізу туралы”шешім жобасы қаралып, мақұлданды. Аудандық қоғамдық кеңес мүшелері бюджет жобасын талқылай келе көптеген ұсыныс - пікірлерін ұсынды. Әсіресе, мемлекеттік басқарудың жоғары тұрған органдарынан түсетін трансферттерге аса назар аударылды. Биылғы жылы Біржан-Ақарал жолы күрделі жөндеуге 720890,0 мың  теңге бөлінді. Биылғы жылы Зайсан-Жаңатұрмыс жолының күрделі жөндеу жұмысы толық аяқталады. Зайсан қаласында құны 3,9 млрд. болатын спорттық сауықтыру кешенін, Сартерек ауылында құны 789 млн. теңге спорт модулінің құрылыстарын бастауға қаржы бөлінді.
Сонымен қатар, Зайсан қаласында 30 пәтерлі 2 үйге және ауылдарда 2 пәтерлі 18 үйге қаржы бөлініп, құрылыстары биыл басталады.
Күн тәртібінің екінші мәселесінде «Зайсан ауданы бойынша әлеуметтік көмек көрсетудің,
мөлшерлерін белгілеудің және мұқтаж азаматтардың жекелеген санаттарының тізбесін айқындаудың
қағидаларын бекіту туралы» қаралып, аудандық қоғамдық кеңес мүшелері бір ауыздан мақұлдады. Келесі мәселе Зайсан ауданы бойынша ауылшаруашылығы мақсатындағы конкурсқа ұсынылатын жер учаскелері қаралып, 11 ауылшаруашылық мақсатындағы жерлерді конкурсқа ұсынуға рұқсат берілді. Күн тәртібіндегі соңғы мәселе аудандық қоғамдық кеңестің 2026 жылғы бекітілген жоспарына сәйкес “Оқушылардың жазғы демалысын
ұйымдастыру бойынша атқарылып жатқан жұмыстар туралы” аудандық білім бөлімінің басшысы М. Мұратқызының хабарламасы тыңдалды. Зайсан аудандық қоғамдық кеңесі “Оқушылардың жазғы демалысын
ұйымдастыру бойынша атқарылып жатқан жұмыстар туралы”  тыңдап, талқылай келе оқушылардың жазғы демалысын ұйымдастыру бойынша біршама жұмыстар атқарылып жатқанын атап өтті. Былтыр «Бәйтерек» спорттық сауықтыру лагері дер кезінде жөндеу, дайындық жұмыстарының ұйымдастырылмағаны себебінен жұмыс істемеген болатын. Биыл осыны ескеріп, «Бәйтерек» сауықтыру лагеріне дер кезінде жөндеу жұмыстары басталып, тиісті қаржысы бюджеттен бөлініп, дайындық жұмыстары қарқынды жүргізілуде.
Сонымен қатар, мектеп жанындағы сауықтыру лагерінде де оқушыларды сауықтыру жұмыстары ұйымдастырылады. Басқа аудандардағы лагерлерге квота бойынша оқушылардың баруын қамтамасыз етуге жұмыстар жүргізілуде. Жазғы сауықтырумен толық қамту мақсатында археологиялық саяхаттар ұйымдастыру жоспарлануда.
11- сынып бітіретін түлектер саны - 412. Қалған 1-10 сыныптан 6096 оқушының сауықтырумен 100 пайыз қамту жоспарлануда.
Оның шінде 27 мектеп жанындағы сауықтыру лагерінде 1207 (22,4%) бастауыш сынып оқушысы, мектеп жанындағы тілдік-бейіндік алаңдарда 260 бала, қала сыртындағы «Бәйтерек» сауықтыру орталығында 4 ауысымда 280 бала, Үлкен Нарын ауданындағы «Приморск» лагерінде 116 бала, Дарындылық пен қосымша білім беруді дамытудың Шығыс Қазақстан ғылыми-әдістемелік Дарын орталығының лагерінде «Жаздық жолдама» жобасы бойынша 10 бала, Самар ауданындағы «Балауса - 2» лагерінде 2 бала сауықтырылады.
700 бала ауданымыздағы киелі Шілікті қорғанына, 150 бала Күршім ауданында орналасқан Қиын Керішке, 100 бала Берел қорғанына саяхатқа барады. 2000- нан астам оқушы тарихи-өлкетану музейіне барса, 3000-ға жуық оқушы отбасылық саяхатпен қамтылады деп
жоспарланған. Алайда облыстық білім басқармасынан балалар демалатын лагерлерде қаржы бірдей бөлінбейтіні анықталып отыр. Мысалы, Үлкен Нарын ауданындағы “Приморск” лагеріне 7 күн сауықтыруға бір балаға ШҚО білім басқармасынан 198500 теңге қаржы қарастырылған. Яғни, бір балаға күніне 28000 теңге, ал біздің “Бәйтерек” сауықтыру лагеріне 4325 теңге ғана. Осы мәселеге кеңес мүшелері қатты назар аударып, кеңес атынан облыстық білім басқармасына, облыстық қоғамдық кеңестің төрайымына хат жолдау жөнінде шешім қабылданды.

Фото

Previous Next