ИНДЕР АУДАНДЫҚ ҚОҒАМДЫҚ КЕҢЕСІНІҢ КЕЗЕКТЕН ТЫС ОТЫРЫСЫ

2026 жылғы 22 мамыр күні аудандық мәдениет үйінде аудандық Қоғамдық кеңестің кезектен тыс отырысы өтті. Отырысқа Қоғамдық кеңес төрағасы Ж.Дауталиев төрағалық етті.

Отырысқа Қоғамдық кеңес мүшелерімен қатар Атырау облыстық Табиғи ресурстар және табиғат пайдалануды реттеу басқармасы басшысының орынбасары Г.Қ.Телеубаева, Экологиялық сараптама және рұқсат беру бөлімінің басшысы Г.Ж.Арыстанова, Жайық-Каспий бассейндік су инспекциясының басшысы Г.А.Азидуллин, Атырау облысы Экология департаментінің бас маманы А.О.Сарсалова, аудандық санитариялық-эпидемиологиялық бақылау басқармасының басшысы А.Д.Қосымбаева, аудандық жер қатынастары, сәулет және қала құрылысы бөлімі мен аудандық кәсіпкерлік, өнеркәсіп және туризм бөлімінің өкілдері, аудандық мәслихат аппаратының қызметкерлері, «Қазақстан Халық партиясы» қоғамдық бірлестігі Атырау облыстық филиалының төрайымы Б.И.Досмұхамбетова, «Глобус» экологиялық-құқықтық бастама орталығы» қоғамдық бірлестігінің басшысы Г.Х.Чернова, «Ақиқат» қоғамдық бірлестігінің төрағасы Ғ.Ж.Габдуллин, Қызылқоға аудандық мәслихатының депутаты, табиғат жанашыры Е.С.Нұров, аудан тұрғындары мен белсенді азаматтар қатысты.

Күн тәртібі:

«Аралтұз» АҚ мен «Арал Сода» ЖШС-нің Индер көлі кен орнының бір бөлігінде тұз өндіру жұмыстарына байланысты Арал ауданының Жақсықылыш ауылына барған сапары туралы «Ақиқат» қоғамдық бірлестігінің төрағасы Ғ.Ж.Габдуллин, сондай-ақ облыстық тиісті басқармаларда өткен кездесулердің қорытындысы туралы «Глобус» экологиялық-құқықтық бастама орталығы» қоғамдық бірлестігінің басшысы Г.Х.Чернова хабарлама жасады.

Отырыста Индер көлі аумағында жоспарланып отырған тұз өндіру жобасының экологиялық қауіпсіздігі, құқықтық негіздері, ҚОӘБ рәсімдерінің сақталуы және табиғи экожүйеге ықпалы кеңінен талқыланды.

Қатысушылар тарапынан Индер көлінің бірегей табиғи нысан екені атап өтіліп, өндірістік қызметтің ұзақ мерзімді экологиялық салдарына байланысты алаңдаушылық білдірілді.

Аудан тұрғындары мен белсенділері Индер көлінің табиғи байлығын сақтау ауданның ұзақ мерзімді дамуы үшін маңызды фактор екенін атап өтті. Сонымен қатар, өндірістік жобалардан гөрі экотуризмді дамыту өңір экономикасы үшін тұрақты әрі қауіпсіз бағыт екені айтылып, көл аумағын және оның экожүйесін сақтау мақсатында оны ерекше қорғалатын табиғи аумақтар қатарына енгізу мәселесін қарастыру ұсынылды.

Мемлекеттік орган өкілдері көтерілген ұсыныстар мен пікірлердің ресми түрде тіркелетінін және қолданыстағы заңнама аясында қаралатынын жеткізді.

Отырыс қорытындысы бойынша қарар қабылданып, барлық ұсыныстар тиісті уәкілетті органдарға жолданатын болды.

Фото

Previous Next