Қазкеңес жаңалықтары

КӨШПЕЛІ ОТЫРЫС ЖАМБЫЛ ОБЛЫСЫНДА

ҚР Мәдениет және ақпарат министрлігінің Қоғамдық кеңесінің көшпелі отырысы 19 маусымда Жамбыл облысында өткізілді.

Отырысты облыс әкімдігінің мәжіліс залында оффлайн және онлайн трансляциямен Қоғамдық кеңестің төрағасы, ҚР Парламенті Сенатының депутаты, Қазақстан халқы Ассамблеясының мүшесі Геннадий Шиповских жүргізді.

Кеңес отырысына облыс әкімі аппаратының басшысы Лесбек Ілебаев, барлық деңгейдегі Қоғамдық кеңестер мүшелері, мемлекеттік органдар қызметкерлері және БАҚ өкілдері қатысты.

Аппарат басшысы Лесбек Құралбайұлы Мемлекет басшысының бастамасымен қабылданған конституциялық нормалар мемлекет пен азаматтық қоғамның әрекеттесуін жаңа деңгейге көтеретініне, азаматтардың мемлекеттік басқару ісіне араласуына нақты мүмкіндіктер жасалғанына тоқталып, Қоғамдық кеңестердің халық алдында есеп беретін мемлекетті қалыптастыру жөніндегі мемлекеттік саясатты іске асыруға барлық деңгейдегі мемлекеттік органдардың, азаматтық қоғам өкілдерінің кеңінен қатысуын қамтамасыз етуге бағытталған қызметті ұйымдастыруда 10 жыл ішінде атқарған жұмыстарының маңыздылығын, оның ішінде Жамбыл облыстық Қоғамдық кеңесінің қолданыстағы заңнама аясында атқарған қызметтерін атап өтті.

Кеңес төрағасы Геннадий Геннадиевич елімізде қабылданған жаңа Конституция аясында азаматтардың құқықтары мен бостандықтарын нығайтуға, мемлекеттік институттардың тиімділігін арттыруға бағытталған елеулі өзгерістер және алғаш рет Заң мен тәртіп, әділеттілік, табиғатқа ұқыпты қарау сияқты қағидаттар Конституция деңгейінде бекітілгенін атап өтті. Жаңа Конституцияның адам құқықтарына бағдарлануы және еліміздің жалпы мемлекеттік құрылымының өзгеруі мемлекет пен азаматтық қоғамның өзара іс-қимылының ролін арттыратыны баса айтылды.

Күн тәртібі бойынша “Халықаралық волонтерлар жылы аясында өткізілетін іс-шаралар туралы” Азаматтық қоғам істері комитеті төрағасының орынбасары Тоғжан Зейденова, “Ұлттық цифрлық мұра” жобасын іске асыру туралы” Цифрлық трансформация және жобалық менеджмент департаменті директорының орынбасары Нұркен Сыздығалин, “ҚР музей қорын қалыптастыру және күтіп ұстау қағидалары туралы” Мәдениет комитеті төрағасының орынбасары Сәбит Барлыбаев баяндама жасады.

“Жамбыл облысы музейлік этнографиясы мен материалдық емес мәдени мұра құндылықтарын сақтау, қорғауды дамытудың мәселелері” жөнінде облыс әкімдігінің мәдениет және тілдерді дамыту басқармасының “Тарихи-мәдени ескерткіштерді қорғау және қалпына келтіру” дирекциясының директоры Сауран Қалиевтің баяндамасында этнофольклорлық бағытта мемлекеттік гранттардың көлемін арттыру, ғылыми-зерттеу жұмыстарын жүргізуге іргелі жобалар дайындау жөнінде көтерілген сұрақтарын отырысқа қатысушылар кеңінен талқылады.

“Жамбыл облысының мемлекеттік архивінің Ұлттық архив қорын цифрландыру туралы” облыс әкімдігінің цифрландыру және архивтер басқармасының архив бөлімінің басшысы Айнұр Құрамысова Халықаралық архившілер Конгресіне 30 елден 500-ден астам адам қатысқанын, Халықаралық архивтер кеңесі Қазақстанның архив қорына жоғары баға бергенін атап өтіп, облыста құжат айналымының 22 % электрондық форматқа көшірілгеніне және алдағы уақытта архивтік құжаттар 100% электрондық форматқа көшіру міндетіне тоқталды.

Қоғамдық кеңес төрағасы көшпелі кеңес отырысының міндеті, мемлекет пен қоғам арасындағы кері байланысты арттырудағы Қоғамдық кеңестердің роліне, Министрліктің қатысуымен Жамбыл облысында өткізу арқылы қасиетті Тараз жерінде өзекті жобаларды жүзеге асыру мәселелерін талқылап, жергілікті атқарушы органдармен бірлесе қарастыру жолдарына тоқталып, Жамбыл облыстық Қоғамдық кеңесімен бірлесе өткізілген көшпелі отырысты қорытындылады.

Фото