Қазкеңес жаңалықтары

Ақмола облысы Қоғамдық кеңесінің мүшелері Қазақстан Республикасының жаңа Конституциясына арналған ғылыми-практикалық конференцияға қатысты

2026 жылғы 1 шілде – Қазақстан Республикасы тарихындағы маңызды күндердің бірі. Осы күні еліміздің құқықтық мемлекет ретінде одан әрі дамуы мен конституциялық негіздерін жетілдірудің жаңа кезеңін айқындаған Қазақстан Республикасы Конституциясының жаңа редакциясы қабылданды.

Осы айтулы оқиға аясында Ш. Уәлиханов атындағы Көкшетау университетінде «Қазақстан Республикасының жаңа Конституциясы: құқықтық мемлекетті нығайту және цифрлық дәуірде құқықтарды қорғау» тақырыбында ғылыми-практикалық конференция өтті.

Конференция жұмысына Ақмола облысы бойынша Әділет департаментінің, Ақмола облыстық сотының, Ақмола облыстық адвокаттар алқасының өкілдері, профессор-оқытушылар құрамы, тәжірибелі заңгерлер, студенттер мен жас ғалымдар қатысты. Іс-шараға сондай-ақ Ақмола облысы Қоғамдық кеңесінің аграрлық мәселелер, экология, инновациялық даму және тұрғын үй-коммуналдық шаруашылық жөніндегі комиссиясының мүшелері, «Құқық» кафедрасының меңгерушісі Рахметулина Б.С. және Шуль В.Л. қатысты.

Конференция барысында Конституцияның жаңа редакциясының негізгі жаңашылдықтары, құқықтық мемлекетті одан әрі нығайтудың перспективалары, азаматтардың конституциялық құқықтары мен бостандықтарын қамтамасыз ету және қорғау, сот төрелігі жүйесін жетілдіру мәселелері, сондай-ақ цифрлық трансформация жағдайындағы қоғамдық қатынастарды құқықтық реттеудің өзекті мәселелері жан-жақты талқыланды. Қатысушылар кәсіби тәжірибелерімен алмасып, конституциялық-құқықтық реформалардың қазіргі бағыттарын талқылап, Қазақстан Республикасының құқықтық жүйесін одан әрі дамытудың маңыздылығын атап өтті.

Осындай ғылыми-практикалық іс-шараларды өткізу заң үстемдігі қағидаттарын нығайтуға, қоғамның құқықтық мәдениетін арттыруға, мемлекеттік органдар, ғылыми қауымдастық және азаматтық қоғам институттары арасындағы сындарлы өзара іс-қимылды дамытуға, сондай-ақ қазіргі заман жағдайында конституциялық құндылықтарды тиімді іске асыру тетіктерін қалыптастыруға ықпал етеді.

Фото