Кезекті отырыс өтті

Қарақия аудандық Қоғамдық кеңесінің жоспарға сәйкес кезекті отырысы Жетібай ауылында өтті. Кеңес төрағасы Ержан Сақтапұлы жүргізген отырысқа аудан әкімі С.Төретаев, аудандық мәслихат төрағасы Ж.Қалаубай, мекеме басшылары мен қоғамдық кеңес мүшелері қатысты.

Жиында Қарақия ауданы әкімінің орынбасары Шапағат Басшыұлы Әзірханов жетекшілік ететін салалар бойынша 2026 жылдың алғашқы бес айында атқарылған жұмыстар мен алдағы жоспарлар, сондай-ақ Жетібай ауылы әкімінің есебі қаралды.

Күн тәртібіндегі алғашқы мәселе бойынша аудан әкімінің орынбасары Шапағат Әзірханов кәсіпкерлік, ауыл шаруашылығы, туризм және жер қатынастары салаларындағы жұмыстар туралы баяндады. Оның айтуынша, ауданда 1900-ден астам кәсіпкерлік субъектісі жұмыс істеп тұр. «Бір ауыл – бір өнім» жобасы аясында жергілікті кәсіпкерлердің өнімдерін қолдау жұмыстары жүргізілуде. Сонымен қатар, «Ауыл аманаты» бағдарламасы арқылы ауыл тұрғындарының кәсіпкерлік бастамаларын қаржыландыру жалғасуда. Туризм саласында Бозжыра шатқалындағы визит-орталық пен этно-кофейня жобалары іске асырылып, туристік әлеуетті арттыру бағытында жұмыстар жүргізілуде.

Екінші мәселе бойынша Жетібай ауылының әкімі Рахат Қаратаев ауылдың бес айдағы әлеуметтік-экономикалық даму көрсеткіштері жөнінде есеп берді. Баяндамашының айтуынша, ауыл толықтай ауыз сумен, табиғи газбен, электр және интернет желісімен қамтылған. Сонымен қатар көше жарықтандыру жүйесін жаңарту, қоғамдық кеңістіктер салу, спорт және балалар ойын алаңдарын жөндеу, абаттандыру және тротуар төсеу бағытында бірқатар жұмыстар жүзеге асырылуда.

Отырыс барысында Қоғамдық кеңес мүшелері атқарылған жұмыстар бойынша пікір білдіріп, өзекті ұсыныстар айтты. Мемлекеттік мекеме басшылары кеңес мүшелерінің ұсынысына жауап беріп, хаттамаға енгізілді.

Фото

Previous Next