Қоғамдық кеңестің отырысы өтті

2026 жылғы 24 шілдеде Д. Шакировтың төрағалығымен Жарқайың аудандық Қоғамдық кеңесінің қалалық такси қызметінің құнын арттыру мәселесіне арналған отырысы өтті.
Отырысқа аудандық мәслихаттың төрағасы А. Әлжанов, аудан әкімінің орынбасары А. Әбенова, Қоғамдық кеңес мүшелері, ауданның Құрметті азаматы Н. Бимендин, мемлекеттік мекемелердің, полиция бөлімінің, мемлекеттік кірістер басқармасының өкілдері, қалалық қоғамдық көлік пен жеңіл такси жүргізушілері, аудан тұрғындары және бұқаралық ақпарат құралдарының өкілдері қатысты.
Отырыс барысында жол жүру құнының өзгеру себептері қаралып, мемлекеттік органдардың, тасымалдаушылардың және Қоғамдық кеңес мүшелерінің баяндамалары тыңдалды. Бұдан кейін барлық мүдделі тараптардың қатысуымен ашық талқылау өтті.
Такси қызметінің құнына жанар-жағармай материалдарының, қосалқы бөлшектердің, көлік құралдарына техникалық қызмет көрсету шығындарының қымбаттауы, инфляциялық үдерістер, сондай-ақ жолаушылар тасымалы қызметіне деген сұраныстың өзгеруі сияқты объективті факторлардың әсер ететіні атап өтілді.
Сонымен қатар, отырысқа қатысушылар заңсыз жолаушылар тасымалының жолын кесу бағытындағы жұмысты күшейту қажеттігіне назар аударды. Себебі мұндай қызмет көлік құралдарының техникалық жай-күйіне тиісті бақылауды, жүргізушілердің міндетті медициналық тексеруден өтуін және қолданыстағы заңнама талаптарының сақталуын қамтамасыз етпейді.
Мәселенің әлеуметтік маңыздылығына ерекше көңіл бөлінді. Аудан тұрғындарының көпшілігі үшін, әсіресе қоғамдық көлік қатынасы шектеулі жағдайларда, такси қызметі қажетті көлік түрі болып табылады. Жол жүру құнының өсуі тұрғындардың, ең алдымен әлеуметтік осал санаттағы азаматтардың отбасылық бюджетіне қосымша салмақ түсіріп, медициналық, білім беру және өзге де әлеуметтік маңызы бар нысандардың көліктік қолжетімділігіне әсер ететіні атап өтілді.
Талқылау қорытындысы бойынша Қоғамдық кеңес жолаушылар тасымалын ұйымдастыруды жетілдіруге, қауіпсіздікті арттыруға, заңнама талаптарының сақталуын қамтамасыз етуге және тасымалдаушылар мен аудан тұрғындарының мүдделерінің теңгерімін сақтауға бағытталған тиісті ұсынымдар қабылдады.
Қабылданған шешімдердің орындалуы аудандық Қоғамдық кеңесінің бақылауында болады.

Фото

Previous Next