Аудандық қоғамдық кеңестің кезекті отырысы өтті.

2026 жылдың 29 шілде күні Зайсан аудандық қоғамдық кеңестің кезекті отырысы өтіп, аудан халқын толғандырып жүрген өзекті мәселелер қаралды. 
Аудандық қоғамдық кеңестің 15 мүшесінен 12 мүшесі қатысты. Күн тәртібіндегі бірінші мәселеде "2026 – 2027 жылдардың қысына дайындық мәселесі бойынша" Зайсан аудандық тұрғын үй – коммуналдық шаруашылығы, жолаушы көлігі және автомобиль жолдары бөлімінің басшысы Ә.Жұмағалиевтың хабарламасы тыңдалды. Аудандағы қазандықтар мен ішкі жылу жүйелеріне техникалық тексерулер жүргізіліп, қажетті жөндеу жұмыстары аяқталуда. Бюджеттік мекемелерді көмірмен қамтамасыз ету бойынша конкурс өткізіліп, мердігерлер анықталып, 1 тамыздан Қаражыра кен орындарынан көмір тасымалданады. Алайда, аудандық Қоғамдық кеңес мүшелері толғандырылатын мәселе газ бармаған ауылдардағы тұрғындарды көмірмен қамтамасыз ету. Бұл мәселе бүгінгі күнге дейін шешімі табылмағанына кеңес мүшелері бөлім басшысына үлкен реніштерін білдірді. Аудандағы Кендірлік кен орнындағы көмір өндіретін мекеме жақында ғана анықталған. Қазіргі уақытта көмір өндіруші мердігер құжаттарын (лицензиясын) алуда. Жұмысын бастағанның өзінде, газ бармаған ауыл тұрғындарын көмірмен толық қамтамасыз ете алмауы мүмкін.
Сондықтан Қаражыра кен орнынан баржамен Тұғыл кентіне көмір әкелуді ұйымдастыру жөнінде аудан әкімшілігі тапсырыс беруде. Бұл мәселені күнделікті аудандық Қоғамдық кеңестің бақылауында болатындығы ескертілді. 
Күн тәртібіндегі екінші мәселе бойынша «Зайсан ауданындағы малдар арасындағы аусыл ауруының эпизоотиялық жағдайы және атқарылып жатқан жұмыстары туралы «Зайсан – Вет» КМК директорының у.м.а. Қ.Енсебаевтың хабарламасы тыңдалып, аудандық Қоғамдық кеңес мүшелері осы ауру төңірегінде көптеген сұрақтар қойып, ұсыныс – пікірлерін айтты. Ауданда малдар арасында аусыл ауруының таралуын болдырмау және эпизоотиялық жағдайды тұрақтандыру мақсатында ветеринариялық – профилактикалық және індетке қарсы іс – шаралар жүргізілседе, нақты нәтиже бермей, бұл ауру аудан көлемінде тоқтамай тұрғандығы атап өтілді. Бүгінгі күні аудан көлемінде 4000 бастан артық ірі қара малы ауырған.
2026 жылы «Зайсан – Вет» КМК мамандары қолда бар барлық 91140 бас ірі қара малы мен 105000 бас қой – ешкі вакцинацияланды. Алайда ауданда жүргізілген ветеринариялық іс–шаралар нақты нәтиже бермегені атап өтілді.  Аудан тұрғындырынан мал дәрігерлік қызметке, мал дәрігерлеріне үлкен наразылықтар тууда. Малдар арасындағы бұл ауруды емдеу жолдары тұрғындар арасында мал дәрігерлері тарапынан толық түсіндірілмегені анықталды. Сонымен қатар ауруға қарсы қолданылатын препараттар мен дәрілерді аудандағы ветаптекалар бағасын орынсыз қымбаттату орын алған. Бір сөзбен айтқанда «Зайсан – Вет» КМК мекемесі мамандары арқылы осы ауруды нақты емдеу жөнінде  идеология қалыптаспаған. Қоғамдық кеңес мүшелері тағы басқа кемшіліктерді анықтап, мекеме басшысына дереу жоюды, жұмыстарын ширатып, ауруды жоюға аудан халқымен бірге жұмыс атқаруды ұсынды. Жалпы Зайсан аудандық «Зайсан – Вет» КМК бұл бағыттағы жұмыстар жеткіліксіз екені атап көрсетіліп, нақты шаралар ұйымдастырып, мал дәрігерлерінің жауапкершілігін арттырып, жүргізу тапсырылды.
Ұйымдастырылған, жүргізілген шаралардың қорытындысы бойынша аудандық Қоғамдық кеңесте қайта қаралатыны ескертілді.
Келесі мәселе «Зайсан қала әкімінің қаланы көгалдандыру, абаттандыру, көркейту және саябақтар мен скверлердің күтімінің жағдайы туралы» мәселе бойынша қала әкімінің орынбасары С.Бақбаевтың хабарламасы тыңдалды. 
2026 жылдың көктем айынан бастап Зайсан қаласын көгалдандыру және көркейту бойынша біршама жұмыстар жүргізілген. Әсіресе, қаланың тазалығы жөнінде нақты жұмыстар атқарылған. Дер кезінде көшелерге, саябақ, скверлерге гүлдер отырғызылып, оны күту ұйымдастырылуда.
2026 жылдың 28 шілдеде аудандық Қоғамдық кеңес мүшелерінің жасаған қоғамдық мониторингінде біршама кемшіліктер анықталғаны атап өтіледі. Абай саябағы қараусыз қалған, су бармаудың себебінен егілген тоғай, шыршалар қурап қалған. Жабайы қураған тоғайлар өте көп, арам шөп басып, аппақ болып қураған. Архитектуралық кіші формаларының тозығы жетіп, бояулары өшіп қалған. Үлкен кигіз үй белгісіз себеппен өртеніп кеткен. Саябақты сары шырмауық (повелиха) басып кеткен, ол ары қарай тарауда.
Спамбетов көшесіндегі көп қабатты үйлердің жанындағы скверлерге су бармау себебінен бірде - бір рет су ішпеген. Егілген шырша, тоғайлар түгелдей қураған. Абай саябағының алдындағы скверлер мүлдем су арылмаған, су аруға арықтағы су жеткілікті ағуда. Бір сөзбен айтқанда ұйымдастыру жұмыстары жүргізілмеген.
Закиев, Аубакиров саябақтары ғана дер кезінде суарылуда. Алайда, бұл саябақтарды арам шөп, бұта, тоғайлар басып кеткен. Қураған тоғайлар кесілмеген. Тәуелсіздік алаңына ештеңе істелмеген. Тек төмен жағында биыл егілген алма ағашы ғана суарылуда.
Зайсан аудандық Қоғамдық кеңес мәселені жан – жақты қарап, талқылап бұл бағытта Зайсан қала әкіміне жұмыстарын ширату ұсынылды. Сонымен қатар саябақтар мен скверлердің күтіміндегі кемшіліктерді тез арада жою, бұл бағытта жұмыстарын бір жүйеге келтіріп, қалыптастыру тапсырылды.
Күн тәртібіндегі соңғы мәселе Зайсан аудандық жер қатынастары бөлімінің басшысы Е.Қайрақбаевтың «Зайсан ауданы бойынша конкурсқа ұсынылатын ауылшаруашылығы мақсатындағы жер учаскелерінің тізіміне келісім беру» мәселе қаралып, ұсынылған 6 жер учаскесінің 5-уіне келісім берілді.

Зайсан аудандық Қоғамдық кеңестің ақпараттық орталығы.

Фото

Previous Next