Тұрақты комиссияның отырысы

Білім беру ұйымдарының жаңа оқу жылына дайындығы: өзекті мәселелер қаралды.

Ақтөбе қаласының Қоғамдық кеңесінің мүшелерімен бірлесіп Ақтөбе қалалық мәслихатының әлеуметтік-мәдени және жастар ісі бойынша тұрақты комиссиясының отырысында 2026–2027 оқу жылына білім беру ұйымдарының дайындық барысы қаралды.

Жаңа оқу жылында қаладағы 120 білім беру ұйымында 116 564 оқушы білім алады. Биыл 12 412 бала 1-сыныпқа қабылданады. Қазіргі таңда 10 564 баланың құжаттары қабылданды. Құжат қабылдау 31 тамызға дейін жалғасады.

Жаңа оқу жылына дейін 2 700 орынға арналған 3 мектептің құрылысы аяқталып, 2 жапсарлас ғимарат пайдалануға беріледі. Олар – Алтын Орда, Оңтүстік Батыс-2, Шилісай-1 тұрғын алаптарындағы мектептер және №8 орта мектеп пен Д.Қонаев атындағы мектеп-гимназияға жапсарлас ғимараттар.

Сонымен қатар, 4 білім беру ұйымында күрделі жөндеу жұмыстары жүргізілуде. Бұл мақсатқа 1,3 млрд теңге бөлініп, оның 3-еуі «Реновация» бағдарламасы аясында жаңғыртылуда. Жұмыстардың орындалуы 85%-ды құрайды, толық аяқтау 20 тамызға жоспарланған.

Отырыс барысында оқушылардың қауіпсіздігі, «Алақан» бағдарламасының іске асырылуы және үш ауысымды оқыту мәселелері талқыланды. Қазіргі таңда үш ауысымды оқыту №64 мектепте сақталып отыр. Мәселені шешу үшін келесі жылы мектепке жапсарлас қосымша ғимарат салу ұсынылды.

Сондай-ақ білім беру ұйымдарының алдағы жылыту маусымына дайындығы қаралды. Депутаттар мен Қоғамдық кеңес мүшелері жылу жүйелерін, қазандықтар мен инженерлік желілерді уақытылы әрі сапалы дайындалуын қамтамасыз етудің маңыздылығын атап өтті.

Фото

Previous Next