Қазкеңес жаңалықтары
KazKENES жаңалықтары«МЕКТЕПБАҚЫЛАУ»: ТАЛҒАР ЖӘНЕ ІЛЕ АУДАНДАРЫНДА МЕКТЕПКЕ ДЕЙІНГІ ҰЙЫМДАРҒА ҚОҒАМДЫҚ МОНИТОРИНГ ЖҮРГІЗІЛДІ
«МЕКТЕПБАҚЫЛАУ»: ТАЛҒАР ЖӘНЕ ІЛЕ АУДАНДАРЫНДА МЕКТЕПКЕ ДЕЙІНГІ ҰЙЫМДАРҒА ҚОҒАМДЫҚ МОНИТОРИНГ ЖҮРГІЗІЛДІ
Балалардың қауіпсіздігі, тамақтану сапасы және санитариялық жағдай қоғамдық бақылаудың басты назарында
6–7 тамыз күндері Алматы облысы Қоғамдық кеңесінің бастамасымен жүзеге асырылып жатқан «МектепБақылау» жобасы аясында Талғар және Іле аудандарындағы мемлекеттік мектепке дейінгі ұйымдарда қоғамдық мониторинг жүргізілді.
Мониторингтің негізгі мақсаты – мектепке дейінгі ұйымдарда балалардың қауіпсіздігін қамтамасыз ету, тамақтандыру сапасын, санитариялық талаптардың сақталуын, медициналық қызметтің ұйымдастырылуын және материалдық-техникалық базаның жай-күйін бағалау.
Қоғамдық мониторинг барысында балалардың тамақтану жүйесі, ас мәзірінің орындалуы, тағамдардың порция көлемі, азық-түлік өнімдерінің сапасы мен сақталуы, олардың тиісті құжаттармен қамтамасыз етілуі зерделенді. Сонымен қатар ас блоктарының санитариялық жағдайы, топтық бөлмелер, медициналық кабинеттер, дәрі-дәрмектердің сақталуы және қажетті құжаттамалардың жүргізілуі назарға алынды.
Талғар және Іле аудандарындағы мониторинг барысында бірқатар мектепке дейінгі ұйымдарда тамақтандыруды ұйымдастыруға, азық-түлік өнімдерінің құжаттарына, санитариялық талаптарға және құжаттамаларды жүргізуге қатысты кемшіліктер анықталды. Кейбір жағдайларда тағамдардың балаларға белгіленген мөлшерде берілуі, азық-түлік өнімдеріне қатысты құжаттардың толықтығы және санитариялық талаптардың орындалуы қосымша бақылауды қажет ететіні байқалды.
Мониторинг барысында тек құжаттар ғана емес, ұйымдардың күнделікті жұмыс барысы да зерделенді. Атап айтқанда, бейнебақылау жазбалары арқылы тағамдардың балаларға берілу тәртібі қаралып, нақты тамақтану жағдайы бағаланды.
Сонымен бірге қоғамдық мониторинг кезінде оң тәжірибелер де анықталды. Бірқатар балабақшаларда аумақтың тазалығы, топтық бөлмелердің талапқа сай ұйымдастырылуы, санитариялық жағдайдың сақталуы және балаларға жасалған жағдайлар жақсы деңгейде екені атап өтілді.
Мониторинг қорытындысы бойынша анықталған кемшіліктер ұйым әкімшіліктеріне жеткізіліп, оларды жоюға бағытталған нақты ұсынымдар берілді. Атап айтқанда, балаларды тамақтандыру сапасын жақсарту, санитариялық талаптардың сақталуын қамтамасыз ету, азық-түлік өнімдеріне қатысты құжаттарды ретке келтіру және медициналық қамтамасыз ету мәселелерін күшейту жөнінде ұсыныстар жасалды.
«МектепБақылау» жобасы – мектепке дейінгі ұйымдардағы жағдайды қоғамдық бақылау арқылы бағалап қана қоймай, анықталған мәселелердің шешілуіне ықпал ететін жүйелі жұмыс. Оның басты мақсаты – балалардың қауіпсіздігі мен денсаулығына қолайлы жағдай қалыптастырып, көрсетілетін қызметтердің сапасын арттыру.
Қоғамдық мониторинг жұмыстары алдағы уақытта да жалғасып, Алматы облысының 9 ауданы мен 2 қаласындағы мемлекеттік мектепке дейінгі ұйымдарды қамтитын болады.
Фото
