Абаттандыру нысандарындағы апталық бақылау

ТКШ бөлімі мамандары Қоғамдық кеңестің мүшесі Луиза Минбаевамен бірлесіп кезекті апталық мониторингтік рейд өткізді.
Рейд барысында жаңартылған тұрмыстық қатты қалдықтарға (ТҚҚ) арналған контейнерлік алаңдарға көлемді қалдықтарды тастауға тыйым салынғаны туралы ақпараттық тақтайшалар орнатылғанына қарамастан, тұрғындардың қоқысты әлі де белгіленбеген жерлерге қалдырып жатқаны анықталды.
Естеріңізге саламыз, көлемді қалдықтарды шығару кестесі мен мердігер ұйымның байланыс телефондары ТКШ бөлімінің әлеуметтік желілердегі ресми парақшаларында жарияланған. «ПМК-2011» ЖШС ескі жиһазды, тұрмыстық техниканы, матрастарды, кілемдерді, есіктерді, терезе жақтауларын, сантехникалық бұйымдарды, велосипедтерді, балалар арбаларын және стандартты қоқыс контейнерлеріне сыймайтын басқа да көлемді заттарды тегін шығарады. Ал құрылыс қалдықтарын шығару ақылы негізде жүзеге асырылады.
Сонымен қатар, қала аумағындағы балалар ойын алаңдарын ағымдағы жөндеу жұмыстары жалғасуда. Мердігер ұйым жұмыстарды бекітілген кестеге сәйкес кезек тәртібімен орындауда. Қазіргі уақытта келісімшарт аясындағы жұмыстар жалғасып жатыр және әлі аяқталған жоқ.
Рейд барысында қаланың орталық көшелерінде бұталарды қалыпқа келтіру және қырқу жұмыстарын жүргізіп жатқан мердігер ұйымдарға ескертулер жасалды. Бұталардың биіктігінің біркелкі сақталмауы және пішінінің талапқа сай болмауы анықталды. Сондай-ақ аулаларда қураған ағаштарды кескеннен кейін ағаш қалдықтарын уақытылы жинау және шығару жұмыстарының жеткіліксіз жүргізіліп жатқаны атап өтілді. Мердігер ұйымдарға анықталған кемшіліктерді қысқа мерзімде жою тапсырылды.

Фото

Previous Next