Тараз қалалық Қоғамдық кеңестің кезекті отырысында әскерге шақырудың жәйі қаралды.

Тараз қалалық Қоғамдық кеңестің кезекті отырысы өтті.

Онда, Тараз қаласы бойынша 2026 жылдың І жартысында Отан алдындағы борыштарын өтеу үшін әскерге шақырылушыларды қамту жағдайы қаралды.

Жиынға жауапты мекемелердің, атап айтқанда, қалалық әкімдіктің, қорғаныс, полиция басқармаларының, медициналық куәландырушы мердігер мекеменің өкілдері қатысты.

Оқылған штатты баяндамалардан өзгелерін тарқата айтсақ, Қоғамдық кеңестің мүшелері әскерге шақыруға тікелей немесе жанама жауапты мекемелер арасында жүйелі байланыстағы бірлескен шаралардың жолға қойылмағанын, мақсатты әрекеттерді өрістетуге кедергі болып отырған бір-бірінің көкейкесті мәселелеріне бас ауыртпауын, насихаттау шараларының кенжелігін (әсіресе, қаладағы жарнамалық билбордтарды қолданудың саусақпен санарлықтай болуын, оның өзінде 10 күнге ғана ілінетінін, халық көп шоғырланатын орындардағы тақталардың мүлдем қолданылмайтындығын), заңның жетілдіруді қажет ететін тұстарын пайдаланып, кейбір діни ұйымдар өкілдерінің әскери борыштан жалтаруын, әскерге жарамсыз жастар арасында асқазан, көз ауруының белең алып кеткенін сынға алды және айтылған ескертпелерді орындауда дана халқымыз айтқандай; "Бір жағадан бас, бір жеңнен қол шығарып", - көтеріліп отырған мәселеге қатысы бар барлық атқарушы органдардың біріккен жұмысын жолға қою қажеттігіне басымдық берді.

П.С.: Жиын барысында халқымыздың: "Саусақ бірікпей, ине ілікпейді", - деген даналығының растығына кезекті рет көз жеткізген жайымыз бар.

Фото

Previous Next