Көкшетауда цифрлық қауіпсіздік мәселелеріне арналған халықаралық конференция өтті

Ш. Уәлиханов атындағы Көкшетау университетінде «Цифрлық қауіпсіздікке төнетін заманауи қауіптер: алаяқтыққа, интернет-алаяқтыққа және дропперлік схемаларға қарсы іс-қимыл» тақырыбында халықаралық ғылыми-практикалық конференция өтті.

Конференцияның негізгі мақсаты – цифрлық кеңістіктегі өзекті қауіп-қатерлерді талқылау, интернет-алаяқтықтың алдын алу жолдарын қарастыру және дропперлік схемаларға қарсы күрестің тиімді тетіктерін айқындау. Конференцияны «Құқық» кафедрасының меңгерушісі, Қазақстан Халық Кеңесінің мүшесі, Ақмола облысының Қоғамдық кеңесінің мүшесі Багдат Сағынғанқызы Рахметулина ұйымдастырды.

Іс-шараға Өзбекстан Республикасының Ташкент мемлекеттік заң университетінің, Л.Н. Гумилев атындағы Еуразия ұлттық университетінің, М.С. Нәрікбаев атындағы КАЗГЮУ университетінің өкілдері, Ақмола облысының құқық қорғау органдарының, Әділет департаментінің, Ақмола облысы Полиция департаментінің және Ақмола облысы сотының өкілдері, сондай-ақ Ақмола облысы адвокаттар алқасының адвокаттары қатысты.

Конференция барысында қатысушылар цифрлық қауіпсіздікті қамтамасыз ету, азаматтардың құқықтары мен заңды мүдделерін қорғау, киберқылмыстардың алдын алу, сондай-ақ халықтың құқықтық және цифрлық сауаттылығын арттыру мәселелері бойынша пікір алмасты. Заманауи технологиялардың қарқынды дамуы жағдайында құқық қорғау органдары, ғылыми қауымдастық және білім беру ұйымдары арасындағы ынтымақтастықтың маңыздылығына ерекше назар аударылды.

Мұндай ғылыми-практикалық алаңдар өзекті мәселелерді бірлесіп талқылауға, кәсіби тәжірибе алмасуға және цифрлық ортадағы құқық бұзушылықтарға қарсы іс-қимылдың жаңа тәсілдерін әзірлеуге мүмкіндік береді.

Цифрлық қауіпсіздік – әр азаматтың жауапкершілігі, ал құқықтық сауаттылық – алаяқтықтан қорғанудың маңызды құралы!

https://www.instagram.com/reel/DerqpDmMfjX/?exln=eGNhOW5uc2cydWpy

Фото

Previous Next