Павлодар облысында «Қаздар қонысы» табиғат ескерткішін сақтау және дамыту мәселелері талқыланды

Бүгін Павлодар облыстық қоғамдық кеңесінің төрағасы Бакір Демеуовтің төрағалығымен республикалық маңызы бар мемлекеттік табиғат ескерткіші «Қаздар қонысы» нысанын сақтау және одан әрі дамыту мәселелері бойынша кеңейтілген ведомствоаралық жұмыс кеңесі өтті. Кеңеске Павлодар облысы әкімінің орынбасары Айгерім Қабылтаева, Қазақстан Республикасы Экология және табиғи ресурстар министрлігі Орман шаруашылығы және жануарлар дүниесі комитеті төрағасының орынбасары, «Қаздар қонысы» табиғат ескерткішін сақтау жөніндегі комиссияның төрағасы Ерлан Құтпанбаев, мүдделі мемлекеттік органдардың басшылары, облыстық қоғамдық кеңестің мүшелері, ғылыми қоғамдастықтың, мұражайлық және қоғамдық ұйымдардың өкілдері қатысты. Отырыс барысында бірегей табиғи нысанды сақтау, оның қазіргі нақты жағдайы, жер-кадастрлық рәсімдеу мәселелері, жағалауды нығайту жұмыстарын жүргізу қажеттілігі және табиғат ескерткішінің одан әрі бұзылуына жол бермеу жөніндегі кешенді шараларды қабылдау мәселелері қаралды. Табиғат ескерткішінің қазіргі жағдайы, жер-кадастрлық мәселелер және оны сақтау бойынша қабылданып жатқан шаралар туралы «Баянауыл мемлекеттік ұлттық табиғи паркі» РММ басшысы Алмаз Жұмашев баяндама жасады. Ә. Марғұлан атындағы Павлодар педагогикалық университетінің доценті, мәдениеттану ғылымдарының кандидаты Валентина Алияcова табиғат ескерткішінің ғылыми маңыздылығына, ғылыми мониторинг жүргізу мәселелеріне және одан әрі зерттеу перспективаларына тоқталды. Павлодар облыстық қоғамдық кеңесінің мүшесі Марина Регатунова табиғат ескерткішін сақтау және дамыту жөніндегі ұсыныстарын, сондай-ақ өзекті мәселелерді шешуге бағытталған іс-шаралардың кешенін қамтитын Жол картасының жобасынмен таныстырды. Бастамашыл топтың жетекшісі Олег Николашин 2028 жылы атап өтілетін «Қаздар қонысы» табиғат ескерткішінің ашылғанына 100 жыл толуына дайындық барысы туралы баяндады. Кеңес қорытындысы бойынша қатысушылар Павлодар өңірінің бірегей табиғи және ғылыми мұрасын сақтау үшін мемлекеттік органдардың, ғылыми қоғамдастықтың және жұртшылықтың күш-жігерін біріктіру қажеттігін атап өтті. Келісілген шешімдерді кеңес хаттамасында бекіту, ал одан әрі іске асыруды талап ететін іс-шараларды бірыңғай Жол картасына біріктіру ұсынылды. Жол картасын пысықтау барысында жауапты орындаушыларды және бірлесікен орындаушыларды, іске асырудың нақты мерзімдерін, күтілетін нәтижелерді және ықтимал қаржыландыру көздерін айқындау қажет. Белгіленген іс-шараларды іске асыру «Қаздар қонысы» табиғат ескерткішін сақтауға, оның тиісті деңгейде қорғалуын қамтамасыз етуге, сондай-ақ одан әрі ғылыми зерттеу мен дамыту үшін жағдай жасауға бағытталатын болады. «Қаздар қонысын» сақтау — болашақ ұрпақ алдындағы ортақ жауапкершілігіміз.

Фото

Previous Next