Қоғамдық кеңестер: ортақ мақсат, бірлескен жұмыс, нақты нәтиже

Облыстық, қалалық және аудандық Қоғамдық кеңестердің төрағаларының қатысуымен жұмыс отырысын өткіздік.

Кездесудің басты мақсаты – Қоғамдық кеңестердің алдағы жұмыс бағыттарын айқындау, өзара ынтымақтастықты нығайту және қоғам алдындағы жауапкершілігімізді арттыру.

Отырыс барысында үш маңызды мәселені талқыладық.

Алдымен, Мемлекет басшысының Қазақстан халқына Жолдауында белгіленген міндеттерді өңірде жүзеге асыруға Қоғамдық кеңестердің қосатын үлесіне тоқталдық. Бұл ретте қоғамдық бақылауды күшейту, халықпен кері байланысты нығайту, әлеуметтік және инфрақұрылымдық мәселелерді зерделеу, мемлекеттік бағдарламалардың орындалуына мониторинг жүргізу бағыттары бойынша нақты ұсыныстар айтылды.

Сондай-ақ облыстық, қалалық және аудандық Қоғамдық кеңестердің жұмысын үйлестіру мәселесін көтердік. Менің ойымша, әр кеңестің өз деңгейінде атқарған жұмысы маңызды болғанымен, ортақ мәселелерді бірлесе көтеріп, тәжірибе алмасып, күш біріктірудің маңызы одан да зор.

Осыған байланысты тұрақты ақпарат алмасу, тоқсан сайын бірлескен отырыстар өткізу, ортақ жұмыс топтарын құру және өңірлік мәселелер бойынша бірлескен қоғамдық мониторинг жүргізу жөнінде ұсыныстар білдірілді.

Мен үшін бүгінгі басқосудың негізгі түйіні – Қоғамдық кеңестердің жұмысы тек отырыс өткізумен, мәселе талқылаумен шектелмеуі керек. Біз көтерген әрбір мәселе нақты ұсынысқа, ал ұсыныс тиісті шешім мен нәтижеге ұласуы қажет.

Қоғамдық кеңестің беделі оның атағымен емес, халықтың сеніміне ие болған нақты ісімен өлшенеді.

Ортақ мақсатымыз – халықтың үнін жеткізу, қоғам мүддесін қорғау және өңіріміздің дамуына өз үлесімізді қосу.

Бірлесе атқарған жұмысымыз нәтижелі болсын!

Фото

Previous Next