Қазкеңес жаңалықтары
Тараз қалалық Қоғамдық кеңесте ЖЫЛДАР БОЙЫ ШЕШІЛМЕЙ КЕЛЕ ЖАТҚАН МӘСЕЛЕГЕ МӘН БЕРІЛДІ

Тараз қалалық Қоғамдық кеңестің кезекті отырысында жергілікті әкімдіктің жұмыспен қамту және әлеуметтік бағдарламалар бөлімінің 2026 жылдың алғашқы 3 тоқсанында көрсетілетін мемлекеттік қызметтерді атқару жәйі қаралды.
Бөлім басшысы Г.Е.Олжабаеваның есебі тыңдалып болғаннан соң, кеңес мүшелері сұрақ-жауапқа көшті.
Онда, бөлім тарапынан алдағы уақытта назар аударуды қажет ететін бірнеше мәселелерге тоқтала келе, соның ішінде, «Айта, айта Алтайды, Жамал апа қартайдының» керіне айналған, толыққанды іске асырылуы, бөлінген қаражаттың мұқтаждардың ыңғайына игерілуі жыр болған, зейнеткерлердің санаторлық-курорттық жолдамасына өтемақы төлеу жағдайына аса мән берілді.
Оған басты себеп – қолда бар дерекке сүйенсек, аталмыш мақсатқа 2024 жылы – 83 млн 70 мың теңге бөлініп, сол жылдың 24 қазанына оның 9 млн 64 мың 100 теңгесі (10,9%) ғана игерілсе, 2025 жылы да сол үрдіс жалғасын тауып, аталмыш жылдың 8 тамызының жағдайында жылға қарастырылған 70 млн 776 мыңның, 4 млн 876 мың 800 теңгесі (6,9%) ғана иесін тапқаны мәлім болды. Ал, 2026 жылға бар болғаны 19 млн 462 мың 500 теңге бағытталғанымен, оның да жағдайы мәз болмай, осы жылдың қарашасында, яғни жылдың аяқталуына 2 айға жуық қана уақыт қалғанда, еңсерілген сома – 9 млн 982 мың 700 теңгені (51,3%) құраған.
Бұдан шығатын қорытынды: жауапты бөлім тарапынан зейнеткерлерді ақпараттандыру жұмысы жеткілікті деңгейде жүргізілмейді немесе оған мүлдем мән берілмейді. Соның кесірінен жүздеген зейнеткер мемлекеттің қамқорлығынан қағылған және қағылуда.
Бұл туралы жиналысқа арнайы қатысқан Жамбыл облыстық және қалалық ардагерлер кеңестерінің Төралқа мүшелері де бұл мәселеде: «Айтылмаған есік, жазылмаған жыр» қалмады. Зейнеткерлердің мәртебесін асыратын емес, құқықтарын қорғайтын мекемеге айналып кеткендейміз», - деп өкпе-наздарын жеткізді.
Анықтама үшін: Тараз қаласы халқы санының нақтылы кезеңде 500 мыңға жуықтауына, ал зейнеткерлер қатарының 59 мыңнан асуына қарамастан, 2026 жылға бөлінген нысаналы қаражат көлемі 19 млн 462 мың 500 теңгені ғана құрап, ол 2024 жылғы (83 млн 70 мың теңге) көрсеткішпен салыстырғанда 76,5%-ға құлдырап кеткен.